Дунёнинг биринчи рақамли аёл теннисчиси Симона Ҳалеп Австралия очиқ чемпионати – Australian Open финалидан кейин шифохонага тушди.
Руминиялик теннисчи шифохонага “сувсизланиш ва ҳолдан тойиш” ташхиси билан етказилган.
ESPN телеканали Симона шифохона койкасида томизғич (капельница) остида ётгани кадрларини намойиш қилган. Телеканал инсайдерларининг айтишича, Халеп томизғич остида 4 соат бўлган.
Биринчи рақамли аёл теннисчи Австралиядаги мусобақада 3 та узоқ давом этган учрашув ўтказган. Унинг 3-даврада Лорен Дэвис билан учрашуви 3 соат 44 дақиқа, яримфиналда Анжелик Керберга қарши учрашуви 2 соат 20 дақиқа ва финалда Каролин Возняцки билан учрашуви 2 соат 51 дақиқа давом этган. Симона рақибига имкониятни бой берган финал учрашуви ўтган вақтда Мельбурнда ҳаво ҳарорати 39 даража иссиққа етган.
Таъкидланишича, Халеп 28 январь куни эрталаб шифохонадан чиққан.
