АҚШ маъмурияти вакиллари Қўшма Штатлар президенти Дональд Трамп ва Россия етакчиси Владимир Путиннинг учрашуви июль ойида бўлиб ўтишидан умид қилмоқда. Бу ҳақда The Times газетаси Британия ҳукуматидаги манбаларга асосан хабар берди.
Нашр маълумотларига кўра, Вашингтонда мамлакатлар етакчилари 11 июль куни бўлиб ўтадиган Брюсселдаги НАТО саммитига қадар ёки ундан аввал, ёхуд Трампнинг Буюк Британияга ташрифидан сўнг учрашишини хоҳлашмоқда. Дональд Трамп Британияга Шимолий Атлантика Альянси давлатлари вакиллари саммитидан сўнг бориши режалаштирилган.
Таъкидланишича, учрашув жойи сифатида Вена танланиши эҳтимолга яқин, сабаби у ерда Европада хавфсизлик ва ҳамкорлик ташкилоти қароргоҳи бор - АҚШ ҳамда Россия бу ташкилотнинг аъзоси саналади.
Британия ҳукуматидаги манбалардан бирининг қайд этишича, ҳукуматга учрашув Трампнинг Британияга ташрифидан сўнг бўлиб ўтиши қулайроқ. Бошқа бир манбанинг таъкидлашича, Трамп ва Путиннинг НАТО саммитига қадар эҳтимолий мулоқоти «ташвишга» сабаб бўлмоқда.
Эслатиб ўтамиз, аввалроқ Путин ва Трамп нега учрашиши кераклиги айтилганди.
