«Манчестер Юнайтед» бош мураббийи Жозе Моуриньо яримҳимоячи Поль Погбани бундан буён сардор бўлмаслигини футболчиларига эълон қилди, деб ёзмоқда The Times.
Португалиялик мутахассис «Вулверҳэмптон»га (1:1) қарши ўйиндан сўнг, Погба берган интервьюдан дарғазаб бўлган. Франциялик футболчи Моуриньонинг ҳимоявий услубини танқид қилиб, «Жамоа кўпроқ ҳужум қилиши керак», деган эди.
Моуриньо Погбанинг сардор бўлишга лойиқ эмаслигини ва жамоа барча нарсадан устун эканини айтган. Футболчилар эса бу гапларга салбий муносабатда бўлишган.
Эслатиб ўтамиз, Погба бу мавсумда уч марта сардор сифатида «Манчестер Юнайтед»ни майдонга олиб тушган эди.
