АҚШнинг халқаро такси хизмати Uber Британия пойабзал ишлаб чиқарувчи Charlotte Olympia билан ҳамкорликни йўлга қўймоқда. Эндиликда Uber бренди остида аёллар пойабзали савдо расталарида пайдо бўлиши кутилмоқда, деб хабар беради Метро нашри.
Компания баланд платформали олтин сандаллар ва Uber shoes бренди билан ишлаб чиқарилаётган баланд пошнали пойабзалларни оммага намойиш этди.
Пойабзал бор-йўғи 14 жуфт ишлаб чиқарилди ва фақат Лондоннинг Harvey Nichols Knightsbridge дўконида 15 ноябрга қадар сотилиши айтилмоқда. Дастлабки маълумотга кўра, унинг нархи 695 фунт стерлинг этиб белгиланган. Бир жуфт оёқ кийим сотиб олган харидорнинг Uber'даги ҳисобига автоматик тарзда 500 фунт стерлинг маблағ ўтказилади ва мижоз бу пулларни такси хизматидан фойдаланиш учун ишлатиши мумкин.
Эслатиб ўтамиз, Uber 2019 йилдан ўз дронларини ишлаб чиқариш ва 2021 йилдан уларни тижорат мақсадларида ишга туширишни режалаётгани ҳақида хабар берилганди.