Australian Open теннис мусобақасининг Новак Жокович ва Люка Пуй ўртасидаги яримфинал учрашуви сербияликнинг 6:2, 6:4, 6:0 ҳисобидаги ғалабаси билан якунланди. Учрашув 1 соат 25 дақиқа давом этган.
Жокович мусобақа финалида 1-яримфиналда Стефанос Циципас устидан ишончли ғалабага эришган Рафаэл Надаль билан учрашади. Теннисчилар бир-бирлари билан ўзаро 53-марта тўқнаш келадилар. Бунгача ўзаро учрашувларда сербиялик 27 марта, испаниялик эса 25 марта ғолиб бўлган. Новак ва Рафаэл “Катта дубулға” мусобақалари финалларида 7 марта учрашишган, бундан 4 тасида испанияликнинг қўли баланд келган.
Жокович “Катта дубулға” мусобақалари финалига 23-марта, жумладан Австралия очиқ чемпионатининг финалига 7-марта чиқди. Сербиялик Мельбурнда ўтувчи мусобақанинг финал баҳсларида бирор марта ютқазмаган. Жокович ушбу мусобақанинг финалида охирги марта 2016 йилда Энди Маррей устидан ғалаба қозонган.
Australian Open 14 январда бошланиб, 27 январгача давом этади.
26 январда ўтадиган аёллар финалида япониялик Наоми Осака ва чехиялик Петра Квитова учрашади. Эркаклар финали эса 27 январда бўлиб ўтади.
Аввал маълум қилинганидек, мусобақанинг мукофот жамғармаси 60,5 млн Австралия долларини (42,7 млн доллар) ташкил қилади.
