Афғонистон миллий мудофаа ва хавфсизлик кучлари "Толибон" ҳаракати жангариларининг Қандаҳор аэродромига қилган ҳужумини қайтарди. Бу ҳақда маҳаллий полиция бошлиғи генерал Тадин Хон Ачакзай маълум қилди.
"Бугун толиблар Қандаҳор аэродромига реактив снаряд йўллади. Ҳужум муваффақиятсиз якунланди. Ҳужум уюштирилган жой аниқланиб, у ердан яна бир снаряд топилди", дея унинг сўзларидан иқтибос келтиради Khaama Press агентлиги.
Полиция бошлиғининг айтишича, хавфсизлик кучлари операцияси чоғида ҳужумга алоқадор уч жангари қўлга олинган.
Агентлик манбасининг сўзларига кўра, ҳужум оқибатида қурбонлар ва жабрланганлар бўлмаган.
