«Манчестер Юнайтед»нинг собиқ ҳимоячиси Патрис Эвра «Soccer AM» дастури меҳмони бўлиб, «Олд Траффорд»да уч йил бирга ўйнаган дўсти Криштиану Роналду ҳақидаги хотиралари билан ўртоқлашди.
«Унинг уйига бошқа ҳеч қачон бормайман. У «ақлдан озган». Мен Криштиануни яхши кўраман, лекин эсимда бор, машғулотдан кейин у мени тушликка таклиф қилганди.
Бордик - катта стол устида фақат сув, катта идишда салат, қуруқ товуқ гўштининг ўзи... Овқатлана бошладик. Криштиану, ҳеч қандай соус йўқми, десам йўқ дейди. Ҳатто овқатланиб бўлмасимиздан у: “Кетдик, боғда тўп тепамиз” деб қолди.
Биз «two-touch» (шеригидан қабул қилиб олган тўпни иккита тегинишда ўзига қайтиб узатиш) ўйнай бошладик. Бундан кейин эса: «Кетдик бассейнга»... Бассейнда суздик. Сўнг саунага бордик.
Мен ундан: «Сен мени тушликка таклиф қилдингми ё навбатдаги машғулотга?» деб сўрадим. Кейинги сафар таклифларингга йўқ дейман.
Уни яхши кўраман, лекин бошқа ҳеч қачон уникига бормайман», – деди Эвра.
У 7-рақам эгасини нега жаҳоннинг энг яхши футболчиси деб ҳисоблашини ҳам айтиб ўтди.
«Криштиану – жаҳоннинг энг зўр футболчиси. Шундай десам у менинг дўстим бўлгани учун шундай ҳисоблашимни айтишади. Лекин Криштиану шунчалик қаттиқ меҳнат қиладики, у ҳеч қачон шикоят қилмайди. Машғулот масалан соат 10да бошланса, у соат 8даёқ бориб оларди. Тренажерда ишларди.
Рио Фердинанд билан стол тенниси ўйнаб ютқазганида, уйига бориб теннис столи сотиб олган ва икки ҳафта шуғуллангач, Риони мағлуб этганди. У ҳеч қачон таслим бўлмайди. У ҳамма нарсада энг яхши бўлишни истайди, мағлуб бўлишни ёқтирмайди. Шунинг учун ҳам уни қаттиқ ҳурмат қиламан, мен учун у – жаҳоннинг энг яхши спортчиси», – дейди Патрис.
Эслатиб ўтамиз, Эвра ўтган ҳафта профессионал фаолиятига нуқта қўйганини эълон қилган эди.