Президентнинг “Қийноқ ҳолатларини аниқлаш ва уларнинг олдини олиш тизимини такомиллаштириш бўйича қўшимча чора-тадбирлар тўғрисида”ги қарори лойиҳаси эълон қилинди.
Белгилаб қўйилишича, омбудсман ҳар йили қийноқ ҳолатларини аниқлаш ва уларнинг олдини олиш бўйича маъруза тайёрлайди ҳамда уни кўриб чиқиш учун, ҳисобот йилидан кейинги йилнинг 15 мартидан кечиктирмай, Олий Мажлис палаталарига тақдим этади ва оммавий ахборот воситаларида эълон қилади.
2021 йил 1 июлдан эътиборан шундай тартиб ўрнатиладики, унга кўра:
- ҳаракатланиш эркинлиги чекланган шахслар ҳафтанинг душанба-шанба кунлари соат 9:00дан 18:00гача бўлган вақтда телефон орқали, шу жумладан, видеконференцалоқа режимидан фойдаланган ҳолда мурожаат қилиши мумкин бўлган омбудсманнинг “call-маркази” (мурожаатларни телефон орқали қабул қилиш маркази) ҳамда веб-сайтида махсус рукн ташкил этилади;
- Ички ишлар вазирлиги манфаатдор вазирлик ва идоралар билан биргаликда ҳаракатланиш эркинлиги чекланган шахслар сақланадиган жойларга жойлаштирилган шахслар ягона электрон реестри юритишни йўлга қўйсин.
Олий Мажлис палаталарига:
- омбудсманнинг қийноқ ҳолатларини аниқлаш ва улар олдини олиш бўйича маърузасини ҳар йили эшитиб бориш амалиётини йўлга қўйиш;
- жамоатчилик гуруҳлари шакллантириш, фаолиятини ташкил қилиш ва мониторинг ўтказиш тартиби тўғрисидаги низомни қабул қилиш тавсия этилмоқда.
