2021 йилнинг ёзги трансферларида Европа клубларида глобал ўзгаришлар бўлиши кутилмоқда.
Асосий жиҳатлар:
- «Барселона», «Сити», «Тоттенҳэм», «Реал» ва «Ювентус»нинг асосий юлдузлари кетиши мумкин. Уларнинг аксари шунчаки етакчилар эмас, балки ўз жамоаларининг 21 асрдаги рамзларидир;
- Янги тўлқиннинг асосий қаҳрамонлари — Эрлинг Ҳоланд ва Килиан Мбаппе — ўсишни ва ўз фаолиятларида чўққига чиқишни исташмоқда. Бу категорияга Санчо, Доннарумма ва Камавингани ҳам қўшиш мумкин;
- Катта клублар фаоллик билан мураббийларни ўзгартирмоқда: «ПСЖ», «Интер», «Реал», «Челси», «Бавария», «Лейпциг», «Боруссия» Д, «Боруссия» М, «Байер», «Рома», «Наполи», «Лилль», «Лион», «Тоттенҳэм» ва «Ювентус» клублари янги мураббийлар билан илк трансферлар ойнасини ўтказади. Бу рўйхатга «Барселона» ҳам қўшилиши мумкин;
- Ёзда Европа чемпионати бўлиб ўтади ва бу ҳамиша қўшимча трансферларга сабаб бўлади;
- Ёзги трансферлар қизғин ўтишига қарши бўлиши мумкин бўлган ягона омил — иқтисодий инқироз. Футболчиларни аввалги каби юқори нархларда сотишга уринадиган сотувчилар ва харидорлар ўртасида жиддий қарама-қаршилик юзага келиши тайин. Бу омил савдоларни тўхтата олмайди, лекин трансферлар мураккаблашиб, узоқ вақт давом этади.
1. Лео Месси ва унинг келажаги.
Шартнома муддати тугамоқда, расмий қарор эса ҳали маълум эмас. Хабарлар турлича: «Барса» ҳозирги миқдордаги маошни таклиф эта олмайди, кўк-анорранглилар қайта қуриш даврида ва кейинги мавсумда ЕЧЛ ғолиблиги учун даъвогарлик қилиши жуда қийин. Бу вақтда эса «ПСЖ» томонидан жиддий қизиқиш бор, парижликлар катта маош тўлашга тайёр, Неймар ҳам клубда қолди, қўшимчасига аргентиналик таниш мураббий Почеттино ва кучайиш бўйича режалар. Бошқа томондан, Лео бир йилдан буён клуб томон қадам ташламаяпти. Сўнгги хабарларга кўра, каталонияликлар унга 10 йиллик шартнома (2 йил клубда ўйнаш, 3 йил клуб элчиси сифатида МЛСга бориш ва кейин қайтиб клубда ишлаш бўйича 5 йиллик шартномага эга бўлиш). У яна ўйлаб кўриб, барибир клубда қолишга қарор қилиши мумкин.
2. «Барселона»да улкан ўзгаришлар амалга оширилиши кутилмоқда.
Леонинг қарори қандай бўлишидан қатъи назар, клубнинг янги президенти ўзгаришларни анонс қилган. Лекин айнан қандай ўзгаришлар бўлиши ҳозирча номаълум, ОАВда Куман, Пике, Бускетс, яна 10га яқин футболчи кетиши ҳақида ёзилган. Президент Месси билан янги шартнома бўйича ишлар давом этаётганини маълум қилган.
Жоан Лапорта: «Биз Чемпионлар лигасини эрта тарк этдик, Ла Лигадаги мағлубиятга изоҳ йўқ. Кўпдан кўп қарорлар қабул қилинади. Биз «Барса» миллий турнирларда ҳам, Чемпионлар лигасида ҳам рақобатбардош жамоага айланиши учун қаттиқ ишлашимиз керак. Бу бир циклнинг якуни бўлади».
Бу жуда жиддий гаплар, агар чемпионат бой берилганидан кейин мухлисларга таскин бериш учун айтилган навбатчи гаплар бўлмаса. Кузатамиз.
3. Агуэро «Сити»ни тарк этади, Вейналдум — «Ливерпуль»дан, Депай «Лион»дан кетади.
Серхио 10 йилдан ортиқ вақт давомида янги «Сити»нинг юзи, бойлик ва муваффақиятли давр рамзи бўлди. Ёши ўтгач эса Кун Манчестерда жуда кам ўйнай бошлади, аммо у ҳали катта футболда яна икки-уч йил тўп суришда давом этиши мумкин. Худди Вейналдум каби.
Депай эса ёш ва «МЮ»даги муваффақиятсизликдан кейин иккинчи бор топ-клубда ўзини кўрсатишга уриниб кўриши мумкин.
Уларнинг барчаси «Барса»га келадими? Бу каталонияликлар учун сифат томондан кучайиш бўларди, аммо бундай трансферлар ҳақида ҳозирча фақат инсайдерлар ёзишмоқда. Агуэро ва Вейналдум масаласи ҳал қилиб бўлингани айтилаётган бўлса, Депай бўйича кўп нарса мавҳум. Афтидан, бу молиявий масалага тақалади.
4. Мбаппе «ПСЖ»дан кетадими?
Шартнома 2022 йил ёзигача тузилган. «ПСЖ» Неймар, Ди Мария, Навас ва Дракслер билан шартномаларни янгилади, аммо «Париж»нинг асосий активи ҳамон интригани сақлаб турибди. Афтидан, Килиан «Реал»га ўтишни истамоқда, «Реал»дагилар ҳам уни жуда кўп вақтдан буён уни таркибда кўришни исташади, аммо «Мадрид» бу трансферни қандай ҳал қилиши савол остида.
Вазиятни «ПСЖ» хўжайинларининг позицияси мураккаблаштирмоқда, улар Мбаппени сақлаб қолиш учун бор имкониятларни ишга солишмоқчи. Улар бунга қодирликларини Неймар билан боғлиқ вазиятда ҳам кўрсатишган, «Барса»га қайтиши деярли ҳал бўлган футболчи янги шартнома тузишга кўндирилганди.
Аввалроқ «ПСЖ» ҳужумчига 2025 йилга қадар амал қилувчи шартнома таклиф қилган, футболчи эса Европа чемпионати якунини кутмоқчилигини маълум қилганди.
Сўнгги хабарларга кўра, Зидан Мбаппенинг қарорига таъсир кўрсатиши мумкин. Журналист Николо Ширанинг ёзишича, шу кунларда «Реал»ни тарк этган Зинедин Зидан парижликлар бошқарувига келиши кутилмоқда. Қайл этилишича, Зиданнинг келиши Килиан Мбаппе клуб билан янги шартнома имзолашини таъминлайди.
ОАВнинг ёзишича, «ПСЖ»ни шу йил қишда қабул қилиб олган бош мураббий Маурисио Почеттино «Тоттенҳэм»га қайтади, у шунингдек, Антонио Конте ва Рауль билан бирга «Реал» шорт-листида турибди.
5. Серхио Рамос «Реал» билан хайрлашадими?
Футболчи жароҳати туфайли мавсумнинг кўп қисмини ўтказиб юборди ва Испания терма жамоасининг Евро-2020 учун қайдномасига киритилмади. Унинг «Реал» билан янги шартномаси бўйича якуний қарор йўқ.
«Реал» маошни камайтирган ҳолда 1 йиллик шартнома таклиф қилмоқда, Рамос — 2 йиллик шартнома истамоқда. Marca маълумотига кўра, Флорентино Перес агар келишувга эришиб бўлмаса, ушбу ҳимоячини қўйиб юборишга қарши бўлмайди. «Реал»да марказий ҳимояда Милитао ва Начо бор, қолаверса, Мадридга Германиядан эркин агент мақомида Алаба келмоқда.
6. Варан ҳам кетадими?
Варан билан шартномани узайтириш (шартнома муддати 2022 йил ёзигача) — раҳбарият учун ёши каттароқ Рамос билан янги шартнома тузишдан кўра устуворроқ вазифа, аммо бу борада ҳам илгарилаш кузатилмаяпти. Агар яқин вақтлар ичида келишувга эришилмаса, «Реал» француз футболчисини кейинги йил текинга қўйиб юбормаслик учун шу йилда сотишга ҳаракат қилади. Арзонлашган нархдаги Рафаэлга даъвогарлар кўп бўлиши тайин.
7. Ҳарри Кейн Гари Невиллга берган интервьюсида янги чақириқлар истаётганини яшириб ўтирмади.
Шу билан бирга, у Англиядан кетмоқчи эмас, шу туфайли унга даъвогарлар доираси «Сити», «МЮ», «Челси» ва «Ливерпуль» билан чекланади, аммо унинг учун сўраладиган нархни рўйхатдаги фақат уч клуб тўлай олиши мумкин.
— Менинг касбим — ғалаба қилиш. Ҳа, мен ҳам ғолиб бўлишни истайман. Мен учун фаолиятим якунида ҳеч нарсадан афсусланмаслик муҳим. Мен ўз салоҳиятимни тўлиқ рўёбга чиқаришни истайман. Мен ҳеч қачон бутун фаолиятимни «Тоттенҳэм»да ўтказишимни айтмаганман. Янада ўса олишимни ҳис қиляпман. Роналду ва Месси даражасига чиқишни истаяпман — бу менинг мақсадим. Буни йўллар айрилиши деб аташ мумкинми? Менимча, ҳа. Мен бу масалани клуб билан муҳокама қилиб олишим даркор. Эҳтимол, Левининг ўзи ҳам мени сотишни истар. Бирдан у шундай ўйлаб қолар: «Агар сен учун 100 млн фунт беришса, нима учун йўқ?» Ахир мен икки-уч йилдан кейин мен учун бунча маблағ тўламасликлари мумкин.
У катта эҳтимол билан 19 май куни «Астон Вилла»га қарши «Тоттенҳэм»нинг уй стадионидаги охирги учрашувини ўтказди.
8. Жанлуижи Доннарумма — яна бир катта лот.
Агент Мино Райола кўп вақт давомида мижози учун катта маош ва ўзи учун катта комиссия пули талаб қилиб келди. Якунда «Милан» юлдузли тарбияланувчиси билан хайрлашишга қарор қилди ва унинг ўрнига «Лилль»дан Меньянни сотиб олди. Парадокс шундаки, янги дарвозабон трансфери, унинг маоши билан қўшиб ҳисоблаганда ҳам, Доннарумма билан шартномани узайтиришдан анча арзонроққа тушди. Жанлуижи эса «Ювентус» сафига бориб қўшилиши мумкин.
9. «Ювентус» барибир Чемпионлар лигасига йўлланма олгач, Роналду кетиши ҳақидаги гап-сўзлар камайди, аммо Криштиану «МЮ»га қайтиши ҳақидаги гапларни бутунлай истисно қилиб ҳам бўлмайди. У «Юве»га тўртинчи ўринни олиш учун келмагани аниқ. Клуб Пирлони ҳам истеъфога чиқарди ва жамоа кейинги мавсумда ҳозиргидан яхшироқ бўлишига кафолат йўқ, шу туфайли Евро-2020 чемпионатидан кейин Криш янги жамоа ҳақида жиддийроқ ўйлай бошлашини кутиш мумкин.
10. Эрлинг Ҳоланд — ёзда клубини ўзгартириши мумкин бўлган яна бир юлдузли футболчидир.
Апрель ойида унинг агенти ва отаси Европа бўйлаб турне ўтказди ва футболчига қизиқиш билдираётган клублар вакиллари билан учрашишди. «Дортмунд» ЕЧЛга йўлланма олган бўлса-да, Эрлинг барибир кетиши ойдинлашмоқда.
Райола Ҳоланднинг «Боруссия»га трансфери хато бўлганини тан олган: «Мен унга бироз бўшашиш ва нисбатан каттароқ клубга эмас, Дортмунднинг «Боруссия» клубига ўтишни тавсия қилганимда хато қилган эканман».
11. Жейдон Санчонинг бошқа чемпионатга ўтиши ҳам шу ёз рўй бериши керак.
У Дортмундда яна бир йил ушланиб қолганди, аммо бу ёзда кетади. Тўғри, бу осон амалга ошмайди, унга «Боруссия» талаб қилаётган 100 миллионо еврони тўлайдиган клуб топилиши қийин.
12. Ёш юлдузлар мавзуси: Эдуарду Камавинга «Ренн» билан клуб тарихидаги илк Чемпионлар лигасида иштирок этди, аммо энди қолишдан маъно йўқ. Конференциялар лигаси — албатта, йўқдан кўра яхши, аммо Европа грандларидан қизиқиш бўлиб турганда, қолиш мантиқсизлик. Ушбу ёш футболчига «ПСЖ» жиддий таклиф берган, аммо бошқа вариантлар ҳам пайдо бўлиши аниқ.
13. Ёзда клубини ўзгартириши мумкин бўлган бошқа футболчилар:
Ҳоқон Чалхонўғли: «Милан» билан шартномани узайтирмаяпти;
Жек Гриллиш ва Деклан Райс: «Астон Вилла» ва «Вест Ҳэм» юлдузларига АПЛнинг топ-клублари харидор бўлмоқда;
Икарди: у Почеттино даврида асосий таркибга кириши савол остида;
Мойзе Кин: «ПСЖ»да кучли мавсум ўтказди, аммо бу мавсум ҳам ўйнаши учун уни «Эвертон»дан сотиб олиш керак бўлади;
Уссем Ауар: ўтган ёдзда трансфер амалга ошмай қолганди, аммо бу сафар у «Лион»ни тарк этиши тайин.
14. Яна бир категория — шартномаси 2022 йил ёзида якунланадиган, шу туфайли ёки шу ёзда сотиш ёки янги шартнома тузиш керак бўлган футболчилардан иборат.
Пауло Дибала
Поль Погба
Ансу Фати
Леон Горецка
Педри
Усмон Дембеле
Франк Кесси
Лоренцо Инсинье
Марсель Забитцер
Дани Карвахаль
Марсело Брозович.
15. Конте ва клуб раҳбарияти ўртасидаги зиддият кутилмаган тарзда якунланди.
Конте чемпионликдан кўп вақт ўтмай «Интер»ни тарк этди. Мистер совринни ҳимоя қилиш ва ЕЧЛдаги натижаларни яхшилашда ёрдам берувчи футболчилар сотиб олишини истади, хўжайинлар эса иқтисод қилиш ва бюджетдаги тешикларни ёпиш учун етакчиларни сотишни. Афтидан, мураббий ортидан Ҳакими, Шкриньяр, Мартинес, Лукаку каби футболчилар ҳам кетади.
16. Зидан «Реал»дан яна бир марта кетди.
Деярли трансферларсиз бошланган жуда қийин мавсумни ўнлаб жароҳатлар янада қийинлаштирди ва якунда жамоа бирорта совринсиз қолди. Француз мутахассис чарчади, у ватани Франциядан иш топиши мумкин, Мадрид клуби эса қайта қуриш даврига кирмоқда.
17. Мураббийлар алмашинуви футболчилар трансферларига ҳам таъсир кўрсатади.
Масалан, «Рома»даги ёрқин мавсумдан кейин Генрих Мхитарян Жозе Моуриньо келгани туфайли клубдан кетади. Генрих қаерга кетиши — сўроқ остида, эҳтимолий вариантлардан бири «Зенит». Арманистонлик футболчи РПЛда легионер деб ҳисобланмайди, у питерликларга ЕЧЛдаги иштирокини яхшилашда ёрдам кўрсатиши мумкин, Петербург клуби бундай юлдуз футболчи учун пулни аямайди.
18. «Рома»да — Жозе Моуриньо, «Фиорентина»да — Гаттузо, «Интер», «Наполи» ва «Сассуоло» янги мураббий қидирмоқда.
Андреа Пирло ўрнига «Ювентус»га Аллегри қайтади, Симоне Индзаги ҳам «Лацио» билан янги шартнома тузмаяпти, уни «Интер» бош мураббийлиги учун асосий номзод сифатида кўришмоқда.
19. Германияда рўй бериб бўлган ўзгаришлар.
Ҳанс-Дитер Флик: «Бавария» — Германия миллий жамоаси;
Юлиан Нагельсманн: «Лейпциг» — «Бавария»;
Жесси Марш: «Зальцбург» — «Лейпциг»
Марко Розе: «Боруссия» М — «Боруссия» Д
Ади Ҳюттер: «Айнтрахт» — «Боруссия» М
Оливер Гласнер: «Вольфсбург» — «Айнтрахт»
ЕЧЛга қайтган «Вольфсбург» янги бош мураббий изламоқда, «Байер» шу кунларда Ҳаннес Вольфнинг тайинловини эълон қилади. Натижада Бундеслига етакчилари бўлган 8 клубдан 7тасида бош мураббийлар ўзгаради, фақат «Унион»да Урс Фишер ўз постини сақлаб қолади.
20. Францияда чемпион бўлган «Лилль»дан бу жаомани қурган Кристоф Галтье кетди, у «Ницца»да катта маош ва таркибни кучайтириш учун кафолатга эга бўлди. «Лион»да ҳам янги мураббий бўлади. «Челси» (Тухель) ва «ПСЖ» (Почеттино) бу ёзда янги мураббийлар билан илк трансферларни амалга оширади. Шунингдек, «Тоттенҳэм» бош мураббийлиги масаласи очиқ қолмоқда.
