Сирдарё вилояти Мирзаобод туманида ЙПХ ходимига маст ҳайдовчини тўхтатишда ёрдам берган ҳайдовчига зўравонлик қилган 6 нафар шахс 15 суткага қамалган. Бу ҳақда ИИВ ЙҲХББ хабар бермоқда.
Маълум қилинишича, жорий йил 30 май куни соат 21:00 ларда Гулистон шаҳри бўйича ИИО ФМБ ЙПХ гуруҳи сафдор ходими Элдор Шамсиев шаҳарнинг Гулистон ҳамда Халқлар дўстлиги кўчалари чорраҳасида хизмат вазифасини олиб бораётганда Нексия-2 машинаси светофорнинг қизил чироғида ҳаракатланган. Ходим унга тўхташ ишорасини берганда, ҳайдовчи бўйсунмасдан қочиб кетган. Шундан сўнг, ЙПХ ходими бошқа ходимларни огоҳлантириб, ўша атрофда турган фуқаролардан бирига тегишли бўлган Нексия-3 машинаси билан қочиб кетган ҳайдовчининг ортидан борган. Ҳайдовчи Мирзаобод тумани ҳудудига етганда тўхтатилган.
Шундан сўнг, ЙПХ ходими фойдаланган Нексия-3 машинаси ҳайдовчиси ортга қайтаётганда, ўша атрофда бўлган олти нафар фуқаро унга зўравонлик қилган. Ўзини «Зокир» деб таништирган фуқаро бошчилигида улар ҳайдовчининг ҳужжатларини олиб қўйиб, ўзини ҳақоратлашган. Унга руҳий босим ўтказишган.
Қайд этилишича, Сирдарё вилояти ИИБ томонидан ҳуқуқбузарлар Маъмурий кодекснинг 46-моддаси 1-қисми, 183, 195, 200-моддалари билан қонунбузилиш ҳолатлари содир этган, деб топилиб, мазкур ҳуқуқбузарлик юзасидан тўпланган ҳужжатлар жиноят ишлари бўйича Мирзаобод туман судига юборилган. Суд зўравонларнинг хатти-ҳаракатларини ўрганиб чиқиб, уларнинг ҳар бирига 15 суткадан маъмурий қамоқ жазосини тайинлаган.
