АҚШ собиқ президенти Дональд Трамп амалдаги президент Жо Байдендан россиялик ҳамкасби Владимир Путин билан Женевадаги учрашув вақтида «мудраб қолмасликни» ва Путинга «саломини етказиб қўйишни» илтимос қилди.
«Байденга президент Путин билан суҳбатда омад тилайман – учрашув вақтида мудраб қолма ва илтимос, унга илиқ тилакларимни етказиб қўй!» деб мурожаат қилган Трамп Байденга.
Трамп 2020 йилги сайловолди кампанияси вақтида рақиби Жо Байденни толиққан ва уйқусираган кўринишда қайд қилинган видеороликлар сабабли «уйқучи Жо» деб атаган.
Собиқ президентнинг таъкидлашича, ОАВнинг фикрига қарамасдан, 2018 йил Хелсинкида Путин билан ўтган учрашувидан АҚШ «кўп нарса ютган, жумладан, Путин ва Россия ҳурматини қозонган».
Путин ва Байденнинг илк учрашуви 16 июнда Женевадаги Ла Гранж вилласида бўлиб ўтади. Шу куни Женева аҳолисига ишхонага бормаслик ва уйларидан ишлаш тавсия қилинган. Шунингдек, фуқароларга саммит ўтадиган жой яқинида дронлардан фойдаланиш ва намойишлар ўтказиш тақиқланиши маълум қилинган.
