Жорий йилнинг 7 июнь куни Turkish Airlines авиакомпанияси самолёти Бухоро аэропортига келиб қўнди. Аэропортда тантанали тадбир ташкил этилди.
Транспорт вазирлиги ахборот хизмати хабарига кўра, авиакомпания томонидан Истанбул – Бухоро – Истанбул йўналишида мунтазам авиақатновлар ҳафтанинг сешанба ва жума кунлари бажарилади.
Ҳозирда Ўзбекистон ва Туркия шаҳарлари ўртасида амалга оширилаётган мунтазам авиақатновлар сони 56 тага етди.
Хусусан, Uzbekistan Airways ҳамда Turkish Airlines томонидан паритет асосида Тошкент – Истанбул – Тошкент йўналишида ҳафтасига 17 тадан, Урганч – Истанбул – Урганч йўналишида ҳафтасига 2 тадан, Самарқанд –Истанбул – Самарқанд йўналишида ҳафтасига 4 тадан, Фарғона – Истанбул –Фарғона йўналишида ҳафтасига 3 тадан ва Бухоро – Истанбул – Бухоро йўналишида ҳафтасига 2 тадан мунтазам қатновлар амалга оширилмоқда.
Бундан олдин БАА компанияси Самарқанд ва Тошкентга парвозларни амалга ошириш учун рухсат олганди.
