Ўзбекистоннинг БМТдаги доимий вакили Улуғбек Лапасов БМТнинг Тараққиёт дастури раҳбари Ахим Штайнер билан учрашди, деб хабар бермоқда «Дунё».
Музокаралар чоғида Ўзбекистон ва БМТТД ўртасидаги ҳамкорликни чуқурлаштириш, хусусан, камбағалликни қисқартириш ва Барқарор ривожланиш мақсадларига (БРМ) эришиш бўйича мамлакат вазифаларини бажаришга қаратилган лойиҳаларни амалга ошириш истиқболлари атрофлича муҳокама қилинди.
БМТнинг Тараққиёт дастури раҳбари Ўзбекистон ижтимоий-иқтисодий ислоҳотларни амалга оширишда сезиларли муваффақиятга эришаётганини қайд этди. Шунингдек, у БРМга эришиш учун Марказий Осиёда биринчи суверен облигациялар чиқарилишини олқишлади.
Ахим Штайнер БМТТД «Ўзбекистон – 2030» стратегиясини амалга оширишда кўмак беришга тайёрлигини ҳамда мамлакат учун муҳим бўлган соҳаларда турли лойиҳаларни амалга оширишда Ўзбекистон ҳукумати билан янада яқин ҳамкорлик қилишга интилишини тасдиқлади.
