Осиё Чемпионлар лигаси Ғарб минтақасида 6-тур ўйинлари якунига етиб, 1/8 финалга йўлланма олган барча жамоалар номи маълум бўлди.
Унга кўра, минтақамиздан 8 жамоа – «Ал-Айн», «Ал-Иттиҳод», «Ал-Ҳилол», «Ан-Наср», «Насаф», «Навбаҳор», «Сипоҳон» ва «Ал-Файҳа» кейинги босқичга йўлланма олди.
ОЧЛ регламентига биноан, 28 декабр куни ўтказиладиган қуръа ташлаш маросимидан олдин 8 жамоа иккита саватчага ажратилади. 1-саватчадан 5та гуруҳдаги 4та энг яхши натижага эга 1-ўринлар жой олса, 2-саватчадан энг ёмон натижа қайд этган гуруҳ пешқадами ва 2-ўрин билан чиққан 3 жамоа жой олади. Қарши клуби гуруҳ пешқадамлари орасида энг кам очко тўплагани сабабли, 2-саватчадан жой олди.
Бир жиҳатдан Қарши клубининг нимчоракфиналда гуруҳ ғолибига қарши тўқнаш келиши Рўзиқул Бердиевни хурсанд қилмаслиги мумкин, аммо рақиб Криштиану Роналду етакчилигидаги «Ан-Наср» бўлиши эҳтимоли ўзбекистонлик мухлисларни хурсанд этмай қолмайди.
Турнирнинг 1/8 финал босқичида бир гуруҳдан чиққан икки жамоа ўзаро майдонга тушмаслигини инобатга олсак, «Навбаҳор» қуръада 1-саватчадаги гуруҳдоши «Ал-Ҳилол»га тўқнаш келмайди. Шу боис, «Ан-Наср»нинг Қарши клубидан кўра, Наманган жамоасига рақиб бўлиш эҳтимоли кўпроқ. Ҳар қандай ҳолатда ҳам Роналду, Бензема ёки Неймар фаолият юритаётган Саудия Арабистони клубларидан бири 1/8 финалда Ўзбекистонга келиши аниқ.
ОЧЛ. 1/8 финал қуръа саватчалари:
1-саватча:
«Ал-Ҳилол» (Саудия Арабистони)
«Ал-Айн» (БАА)
«Ан-Наср» (Саудия Арабистони)
«Ал-Иттиҳод» (Саудия Арабистони)
2-саватча:
«Насаф» (Ўзбекистон)
«Навбаҳор» (Ўзбекистон)
«Сипоҳон» (Эрон)
«Ал-Файҳа» (Саудия Арабистони).
Маълумот учун, ОЧЛ нимчоракфинал дастлабки баҳслари 12-13 феврал кунлари 2-саватчадаги жамоалар майдонида, жавоб учрашувлари эса бир ҳафтадан кейин – 19-20 феврал кунлари 1-саватчадаги жамоалар уй стадионида бўлиб ўтади.
