Ўрта Чирчиқда сайлов жараёнлари. Янги сайланадиган президентдан нима кутишяпти?

Ўзбекистонликлар бугун келгуси 7 йил учун президентликка танловни амалга оширишмоқда. Kun.uz мухбири Тошкент вилоятида бўлиб, сайлов жараёнлари қандай ўтаётгани билан қизиқди.

Тошкент вилояти Ўрта Чирчиқ туманидаги 848-сайлов участкасида жами 2 821 нафар сайловчи рўйхатга олинган. Уларнинг 95 нафари муддатидан илгари овоз берган.

Сайлов участкаси комиссия аъзоси Асола Холмирзаеванинг таъкидлашича, сайловчилар учун барча шароитлар яратилган: “Тез тиббий ёрдам” хизмати, болалар учун махсус жой ташкил этилган.

Сайловчилар Kun.uz мухбири билан суҳбатда ўз номзодларидан нималар кутаётганликлари ҳақида сўзлаб беришди.

“Далада меҳнат қилиб, кетмон чопиб қийинчилик замонларни ўтказганмиз. 63 ёшдан ўтсак ҳам ҳозиргача ўзимизнинг нонимизни ўзимиз топиб еяпмиз. Пенсияларимиз оширилса, арзончилик бўлса деймиз. Янги сайланадиган президентимиздан ана шулар амалга оширилишини кутамиз”, дейди 63 ёшли сайловчи.

Илк бор овоз бераётган 18 ёшли сайловчи эса сайланадиган президент ёшларга янада кенгроқ эътибор қаратишини кутаётганлигини таъкидлади:

“Бугун мен биринчи марта сайловда овоз бердим. Келгусида сайланадиган президентимиздан ёшларга эътибор қаратилишини, салоҳиятли ёшларга кўпроқ имконият берилишини хоҳлайман. Ўзбекистон ёшларининг келажаги давлат раҳбарига боғлиқ. Ҳозир ҳам ёшларга яратилган шароитлар яхши, бундан кейин ҳам мактабларга алоҳида эътибор берилишини истардик”.

Вилоятда сайлов жараёнлари давом этмоқда.

#президентлик сайлови #Ўрта Чирчиқ

Ўзбекистонда 2023 йил 9 июл куни муддатидан илгари президенти сайлови бўлиб ўтади. Янгиланган Конституцияга кўра, президент ваколат муддати ҳозирги 5 йилдан 7 йилга оширилган.