Samsung компанияси Сан-Франциско (Калифорния, АҚШ)да дастурчилар учун бўлиб ўтган анжуманда замонавий «ақлли» уйлар учун роботлаштирилган ёрдамчи Otto қурилмасини намойиш этди.
Қурилма «Интернет буюмлари» концепцияси доирасида ишлаб чиқарилган бўлиб, унинг асосига эса Artik аппарат платформаси ўрнатилган. Робот камера, мкрофонлар, динамик ва «бош»га бириктириладиган кичик дисплейдан ташкил топган. Экран юз қиёфаси ва анимацияланган суратларни намойиш этишга хизмат қилади.
Otto саволларга жавоб бера олади: фойдаланувчилар об-ҳаво маълумоти ҳақида хабардор бўлишлари ёки сўнгги янгиликларни тинглашлари мумкин. Робот шунингдек, мусиқани янграта олади ва интеллектуал маиший жиҳозлар билан боғлиқликда ишлайди.
Бундан ташқари, Otto уйни қўриқлаш вазифасини ҳам бажара олади, яъни у махсус камера орқали уй эгасининг мобиль қурилмаси ёки шахсий компьютерига тасвирлар юборади. Роботнинг боши ўнгга, чапга айланаши ва пастга, тепага эгилиши мумкин. Бу эса унга уйнинг барча бурчагини аниқ кузатишига ёрдам беради.
Otto ҳозирги кўриниши - бор-йўғи прототип, ҳолос. Samsung компанияси мазкур қурилмани савдо бозорларига чиқаришни режалаштирмаган.