Indonesia AirAsia авиакомпанияси дунёдаги энг нопунктуал лоукастер, деб топилди. Фуқаролик авиацияси парвозларининг мониторинги билан шуғулланувчи FlightStats компанияси маълумотлари шундан далолат беради.
Июль ойи маълумотларига кўра, Малайзиянинг AirAsia бюджет ташувчисининг Индонезия бўлими рейсларининг 53,58 фоизи 15 дақиқадан ортиқ вақтга кеч қолиб келган. 46,42 фоиз самолётлар эса вақтида қўнган.
Июль ойининг энг нопунктуал лоукастерлари орасида иккинчи ўринда Испаниянинг Vueling Airlines'и қайд этилган. Ташувчининг 52,78 фоиз рейслари турли сабабларга кўра ушланиб қолган, 47,22 фоизи эса кўзланган мақсадга кеч қолишларсиз етиб келган.
Учликни 50,40 фоиз лайнерларининг кечикиши билан Туркиянинг Pegasus Airlines бюджет авиакомпанияси ёпади (49,60 фоизи вақтида келган).
Июль ойи якунларига кўра, энг пунктуал лоукастер сифатида Япониянинг StarFlyer'и эътироф этилган. Ташувчининг 92,66 фоиз рейси кечикишларсиз амалга оширилган. Шунингдек, етакчилар учлигида Бразилиянинг Azul (91,87 фоиз) ва Чилининг Sky Airline (89,49 фоиз рейслар) лоукастерлари номлари келтирилган.
