Honda компанияси Civic хэтчбекининг Европага мўлжалланган версиясини ошкор қилди. Автомобилнинг оммавий илк намойиши октябрда Париж автосалонида бўлиб ўтади. Янги модель 2017 йил бошидан сотувга чиқарилади. Модель Британиянинг Суиндон шаҳрида йиғилади.
Сivic-хэтчбек японлар шундай номдаги седан ва купеда қўллаган услубда бажарилган. Автомобиль икки патрубкали тутун чиқариш тизими, аэродинамик спойлер ва ўзига тортувчи бамперлар олди. Салонда янги ўриндиқлар, 7 дюймли сенсор дисплей, иккинчи авлоддаги Connect ахборот-кўнгилочар тизими ўрнатилган.
Автомобиль янги платформада қурилган. Бунинг эвазига машинанинг оғирлиги 16 кг га енгиллашган. Автомобиль узунлиги 4497 мм, эни 1800 мм ни, ғилдираклар базаси 2700 мм ни ташкил қилади.
Европада моделнинг базавий версияси 127 от кучи ва бир литр ҳажмга эга бензинли двигатель билан таклиф қилинади. Уч цилиндрли двигатель 6 поғонали механик узатмалар қутиси билан бирга ишлайди. Моторлар қаторидан шунингдек 4 цилиндрли бензинли турбомотор ҳам жой олган. Бу двигателнинг қуввати 180 от кучини ташкил қилади.
Кейинроқ моделнинг кучлироқ Type R версияси ҳам пайдо бўлиши мумкин. Норасмий маълумотларга кўра, бундай модификацияли Civic хэтчбеки 2,0 литрли ва 300 от кучидан кўпроқ қувватга эга двигатель билан жиҳозланади.
.
