Украина президенти Петро Порошенко Европа Иттифоқини «ДХР» ва «ЛХР» паспортларини тан олгани учун Россияга қарши янги санкциялар қўллашга чақирди. Бу ҳақда президент матбуот котиби Святослав Цеголко маълум қилган.
«Президент сохта давлатларнинг сохта ҳужжатларини тан олган Россияга қарши санкцияларни кучайтиришга чақирди», - дея ёзган у твиттерида.
Порошенко бу фикрини ЕИ комиссари Христос Стилианидес билан учрашуви вақтида маълум қилган. Украинлар етакчисининг фикрича «ДХР» ва «ЛХР» ҳужжатларини тан олиш Минск келишувларига зиддир.
18 февраль куни Россия президенти Владимир Путин Россия «Донецк халқ республикаси» («ДХР») ва «Луганск халқ республикаси» («ЛХР») маъмурияти томонидан берилган шахсни тасдиқловчи ҳужжатларни ҳақиқий деб тан олиш ҳақидаги фармонини имзолади.
Паспортлардан ташқари, «ДХР» ва «ЛХР»нинг таълим олганлик ҳақидаги ҳужжатлари, туғилганлик ва ўлим, никоҳ қайд этилгани ва никоҳ бекор қилингани ҳақидаги гувоҳномалари, шунингдек, давлат автомобиль рақамлари ҳам Россия томонидан ҳақиқий деб тан олинган.
Украина президенти Петро Порошенко Россия айирмачиларга тегишли ҳужжатларни тан олишини халқаро ҳуқуқбузарлик деб атади.
АҚШнинг Украинадаги элчихонаси «Донецк халқ республикаси» ва «Луганск халқ республикаси»даги айрим туманлар аҳолиси ҳужжатларининг Россия томонидан тан олиниши Минск шартномаси мақсадларига зид эканлигини маълум қилди.
