Британиянинг The Beatles гуруҳи аъзоси Жон Ленноннинг Double Fantasy альбоми 1,5 млн доллар эвазига сотувга қўйилди. Унда Леннон томонидан Марк Чепманга имзо қўйилган бўлиб, Чепман имзо қўйилганидан бир неча соат ўтиб, мусиқачини отиб ўлдирган.
Савдолар турли хотира буюмларини сотиш билан шуғулланувчи Moments in Time агентлиги томонидан ташкил этилди.
«Тарихий жиҳатдан катта аҳамиятга эга шундай буюмни аукционга қўйишдан хурсандмиз. Полиция ҳисоботлари, бармоқ изларининг олиниши, округ прокуроридан хат каби катта тарихга эга буюмга ҳеч қачон рўпара бўлмаганман», - дея маълум қилди сайт вакили ва сотувчи Боб Зафианнинг агенти.
Таъкидланишича, пластинка Ленноннинг ўлдирилиши бўйича ишда ашёвий далиллардан бирига айланган, сабаби унда қотилнинг бармоқ излари бўлган.
1980 йилнинг 8 декабрь куни Марк Чепман Йоко Оно билан овоз ёзиш студиясидан қайтаётган Жон Леннонга беш марта ўқ узган. Мусиқачи кўп қон йўқотгани сабаб ҳаётдан кўз юмган.
