Ўзбекистон Республикасининг Жиноят ва жиноят-процессуал қонунчилигини такомиллаштириш концепцияси тасдиқланди. Бу ҳақда Ўзбекистон Республикаси Президенти Шавкат Мирзиёев имзолаган "Жиноят ва жиноят-процессуал қонунчилиги тизимини тубдан такомиллаштириш чора-тадбирлари тўғрисида"ги қарорда шундай дейилади.
Ҳужжатга кўра, Ўзбекистон Республикасининг Жиноят ва жиноят-процессуал қонунчилигини такомиллаштиришнинг асосий йўналишлари ва вазифалари этиб қуйидагилар белгиланди.
- жиноят қонунчилиги нормаларини унификация қилиш;
- жиноий жавобгарлик ва жазо тизимини такомиллаштириш;
- фуқаролар ҳуқуқ ва эркинликлари, жамият ва давлат манфаатларининг таъсирчан ва ишончли муҳофаза қилинишини таъминлаш;
- жиноят-процессуал қонунчилиги нормаларини тизимлаштириш ва уйғунлаштириш;
- жиноят процессида шахснинг ҳуқуқ ва эркинликлари кафолатларини ишончли таъминлаш механизмларини такомиллаштириш;
- жиноят процессининг янги шакл ва тартиб-таомилларини киритиш.
Замонавий халқаро стандартлар ва илғор хорижий тажрибани инобатга олган ҳолда, шунингдек, 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясига мувофиқ жиноят ва жиноят-процессуал қонунчилигини такомиллаштиришнинг мутлақо янги устувор йўналишларини ишлаб чиқиш ва амалга ошириш қарорнинг асосий мақсадини ифодалаб беради.
