Facebook ижтимоий тармоғидаги Drivetribe ҳамжамияти саҳифасида Taschen нашриёт уйининг италиялик журналист Пино Алтиеви билан ҳамкорликда нашр этган “Il Fascino Ferrari” китоби намойиш қилинган видео жойлаштирилди. Китобнинг ўзига хослиги шундаки, у алюминийдан ишланган, V12 двигатели кўринишидаги тагликка эга ва нархи 22500 фунт стерлингни ташкил қилади.
Китоб италян маркаси ва хусусий коллекционерлар архивларидан олинган юзлаб суратлар, расмлар ва эскизлардан иборат 480 саҳифалик китоб бўлиб, Collector’s ва Art Edition вариантларида чиқарилган. Китобнинг Art Edition варианти 250 дона миқдорида чоп этилган бўлиб, айнан у оригинал ғилоф ва таглик билан таклиф қилинмоқда. Китобнинг Collector’s варианти анча арзонроқ – 4500 фунт стерлинг туради.
Ferrari ҳақидаги энг қиммат китобнинг нархи 38400 евро бўлиб, Sotheby’s аукцион уйи айнан шу нархга углепластикдан ишланган ва оқ бриллиант билан безалган ғилофга эга The Official Ferrari Opus, Diamante Edition китобини сотган.
