Тошкент давлат аграр университети ректори, академик Ботиржон Сулаймоновнинг АҚШга ташрифи давомида Ўзбекистон қишлоқ хўжалиги учун кадрлар тайёрлаш ва уларнинг малакасини ошириш ҳамда таълим соҳасидаги ҳамкорликни кучайтириш мақсадида Миссисипи штати университети ва Тошкент давлат аграр университети ўртасида икки томонлама ҳамкорлик тўғрисида келишув имзоланди.
Эндиликда ўзбекистонлик талабалар Миссисипи штати университетининг турли йўналишлари бўйича амалиёт ўтказишлари, профессор-ўқитувчилар эса АҚШда малака оширишлари, шунингдек, АҚШнинг юқори малакали мутахассисларини Тошкент давлат аграр университетида ўқув жараёнига жалб этиш ва икки томонлама диплом бериш қўшма дастурларни жорий этиш йўлга қўйилади.
Шунингдек, Ботиржон Сулаймонов Миссисипи штатининг Алкорн университети президенти Д.Ли ва Шимоли–Ғарбий коллеж президенти Ш.Маккей билан учрашди. Учрашувлар давомида Тошкент давлат аграр университети ҳамда Шимоли–Ғарбий коллеж ва Алкорн университетлари ўртасида талабалар ва профессор-ўқитувчилар алмашувини амалга ошириш, икки томонлама диплом бериш қўшма дастурларни жорий этиш, қишлоқ хўжалиги соҳасидаги профессор-ўқитувчилари ТошДАУда маърузалар ўқишларини, шу жумладан вебинарларни жорий этишга келишиб олинди.
Апрель ойида Миссисипи штати университети раҳбарияти Ўзбекистонга ташриф буюриши амалга ошириши режалаштирилди. Ушбу ташриф давомида Тошкент давлат аграр университети ҳамда Миссисипи штатининг Алкорн университети ва Шимоли–Ғарбий коллеж ўртасида шартнома ва йўл хариталари имзоланиши келишиб олинди.
