Дам олиш кунлари Италия чемпионатида сўнгги тур ўйинлари ўтказилди. Унинг якунига кўра Чемпионлар Лигаси ва Европа Лигасида иштирок этадиган жамоалар, шунингдек, қуйи лигага йўл олган жамоа номи маълум бўлди.
«АТАЛАНТА» БРОНЗА МЕДАЛЛАРИНИ ҚЎЛГА КИРИТИБ, МАВСУМ КАШФИЁТИГА АЙЛАНДИ
«Аталанта» ўз майдонида «Сассуоло» билан ўйнади. Мезбонлар Чемпионлар Лигаси йўлланмасини қўлга киритиш учун бу ўйинда мағлуб бўлмаслиги керак эди. Жан Пьеро Гасперини шогирдлари бу вазифани ортиғи билан бажаришди.
19-дақиқада «Сассуоло» Берарди голи эвазига ҳисобда олдинга чиқиб олди. 35-дақиқада Сапата гол уриб, ҳисобни тенглаштирди. Ҳал қилувчи воқеалар 1-бўлимнинг сўнгги дақиқаларида юз берди. Ҳар иккала жамоа футболчиларининг асаблари жунбушга келиб, орани очиқ қилишга тушиб кетишди. Натижада, бош ҳакам уларнинг бир нечасини огоҳлантирди, жуда ҳам «фаоллик қилган» Берардини эса қизил карта билан «сийлади».
«Аталанта» таркибдаги устунликдан унумли фойдаланиб қолди. 53-дақиқада Гомес ва 65-дақиқада Пашалич томонидан урилган голлар бергамоликларга 3:1 ҳисобидаги ғалабани келтирди.
Натижада «Аталанта» 69 очко билан учинчи ўринни эгаллади ва ўз тарихида илк маротаба Чемпионлар Лигасида ўйнайдиган бўлди. Бундан ташқари Жан Пьеро Гасперини шогирдлари 77та гол билан А Сериянинг энг ҳужумкор жамоасига айланишди.
Аталанта – Сассуоло 3:1 (1:1, 2:0)
26 май, «Читта-дель-Триколоре» стадиони
Голлар: 0:1 – 19 Берарди, 1:1 – 35 Сапата, 2:1 – 53 Гомес, 3:1 – 65 Пашалич.
Аталанта – Голлини (Росси, 90), Масьелло (Пашалич, 62), Гимшити, Паломино, Кастань, де Рон, Фройлер, Госенс, Гомес (Манчини, 90), Иличич, Сапата.
Сассуоло – Пеголо, Лирола (Распадори, 90), Демирал, Феррари, Рожерио, Бурабия, Маньянелли, Данкан, Берарди, Локателли (Журичич, 59), Бога (Серникола, 85).
Огоҳлантиришлар: Иличич (38), Рожерио (45), де Рон (45), Маньянелли (45), Феррари (48).
Четлатишлар: Берарди (45), Маньянелли (83).
«ИНТЕР» ЖУДА ҚИЙИН ҒАЛАБА ОРҚАЛИ ЧЕМПИОНЛАР ЛИГАСИГА ИЛИНИБ ҚОЛДИ
«Интер» ўз майдонида аутсайдерлардан бири «Эмполи»ни қабул қилди. Мезбонлар Чемпионлар Лигаси йўлланмасини қўлга киритиши учун бу ўйинда ғалабага муҳтож, «Эмполи» эса А Серияда қолиши учун камида дуранг ўйнаши шарт эди.
Қаторасига 4та ўйинда ғалаба қозонган «Эмполи» бу беллашувга кўтаринки кайфиятда келди. Бироқ, «нерадзурри»нинг ўз режалари бор ва улар рақибнинг мақсадига мос эмасди.
«Интер» ўйин давомида катта устунликка эга бўлди. 1-бўлимда бир неча қулай вазиятлардан фойдалана олмади. 51-дақиқада Бальде ҳисобни очишга эришди. 61-дақиқада Икарди фарқни ошириши мумкин эди, аммо унинг пенальтидан йўллаган зарбасини дарвозабон Драговски қайтара олди. 76-дақиқада эса «Эмполи» ҳисобни тенглаштирди. Жарима майдонига етказилган тўпни Траоре «Интер» дарвозасига йўллаб, «Сан-Сиро»ни карахт аҳволда қолдирди. Бу натижа «Эмполи»га А Серияда қолиш имконини берар, мезбонларни эса Чемпионлар Лигаси йўлланмасидан маҳрум қиларди. Аммо орадан 5 дақиқа ўтгач, «Интер» вазиятни ўнглади. Ҳимоячилар хатосидан фойдаланган Наингголан ўйинда ҳал қилувчи голни уриб, жамоасига ғалаба келтирди. «Эмполи» эса кейинги мавсумни В Серияда ўтказадиган бўлди.
Интер – Эмполи 2:1 (0:0, 2:1)
26 май, «Жузеппе Меацца (Сан-Сиро)» стадиони
Голлар: 1:0 – 51 Кейта Бальде, 1:1 – 76 Траоре, 2:1 – 81 Наингголан.
Интер – Ҳанданович, Д`Амброзио, де Врей, Шкриньяр, Асамоа (Кейта Бальде, 46), Весино, Брозович, Политано, Наингголан, Перишич (Далберт, 74), Икарди (Мартинес, 71).
Эмполи – Дронговски, Майетта (Учан, 71), Сильвестре, Делль`Орко, Беннасер, Ди Лоренцо, Паяч, Аккуа (Бриги, 71), Траоре, Капуто, Фариас.
Огоҳлантиришлар: Кейта Бальде (52), Паяч (64), Перишич (72), Капуто (90), Д`Амброзио (90).
Четлатишлар: Кейта Бальде (90), Перуккини (90).
«МИЛАН»НИНГ ҒАЛАБАСИ КЕРАКСИЗ БЎЛИБ ЧИҚДИ, ЖАМОА ЕВРОПА ЛИГАСИДА ТЎП ТЕПАДИ
«Милан» сафарда СПАЛ билан ўйнади ва 3:2 ҳисобида ғалаба қозонди. Яримҳимоячи Франк Кессие беллашувда 2та гол уришга муваффақ бўлди. Аммо бу ғалаба «россонери»га асқотмади. Жамоа нафақат бу ўйинда зафар қучиши, балки «Аталанта» ва «Интер» ҳам қоқилиши керак эди. Аммо, ҳар иккала жамоа ўз ўйинида ғалаба қозонгани боис, «Милан» Чемпионлар Лигаси йўлланмасини берувчи 4-ўриндан 1 очко ортда қолган ҳолда 5-ўринни эгаллади ва келаси мавсумда Европа Лигасида ўйнайдиган бўлди.
СПАЛ – Милан 2:3 (1:2, 1:1)
26 май, «Паоло Мацца» стадиони
Голлар: 0:1 – 18 Чалҳанўғли, 0:2 – 23 Кессие, 1:2 – 28 Викари, 2:2 – 53 Фарес, 2:3 – 66, пенальти Кессие.
СПАЛ – Вивиано, Чонек (Флоккари, 77), Викари, Бонифаци, Ладзари, Валоти (Янкович, 72), Муржиа (Шимич, 90), Куртич, Фарес, Петанья, Антенуччи.
Милан – Доннарумма (Рейна, 21), Абате (Кутроне, 63), Мусаккьо, Романьоли, Родригес, Кессие, Бакайоко, Чалҳанўғли, Сусо, Пёнтек, Борини (Конти, 80).
Огоҳлантиришлар: Абате (27), Бонифаци (36), Чонек (65), Бакайоко (81).
38-ТУР НАТИЖАЛАРИ
25 май
Фрозиноне – Кьево 0:0
Болонья – Наполи 3:2 (2:0, 1:2)
Голлар: 1:0 – 43 Сантандер, 2:0 – 45 Жемаили, 2:1 – 57 Ғулом, 2:2 – 77 Мертенс, 3:2 – 88 Сантандер.
26 май
Торино – Лацио 3:1 (0:0, 3:1)
Голлар: 1:0 – 51 Яго Фальке, 2:0 – 53 Лукич, 2:1 – 66 Иммобиле, 3:1 – 80 де Сильвестри.
Сампдория – Ювентус 2:0 (0:0, 2:0)
Голлар: 1:0 – 84 Дефрель, 2:0 – 90 Капрари.
Рома – Парма 2:1 (1:0, 1:1)
Голлар: 1:0 – 35 Пеллегрини, 1:1 – 86 Жервиньо, 2:1 – 89 Перотти.
Аталанта – Сассуоло 3:1 (1:1, 2:0)
Голлар: 0:1 – 19 Берарди, 1:1 – 35 Сапата, 2:1 – 53 Гомес, 3:1 – 65 Пашалич.
Кальяри – Удинезе 1:2 (1:0, 0:2)
Голлар: 1:0 – 17 Паволетти, 1:1 – 59 Хадльвредссон, 1:2 – 69 Де Майо.
СПАЛ – Милан 2:3 (1:2, 1:1)
Голлар: 0:1 – 18 Чалҳанўғли, 0:2 – 23 Кессие, 1:2 – 28 Викари, 2:2 – 53 Фарес, 2:3 – 66, пенальти Кессие.
Фиорентина – Женоа 0:0
Интер – Эмполи 2:1 (0:0, 2:1)
Голлар: 1:0 – 51 Кейта Бальде, 1:1 – 76 Траоре, 2:1 – 81 Наингголан.
А СЕРИЯНИНГ ЯКУНИЙ ЖАДВАЛИ
А СЕРИЯ ТЎПУРАРЛАРИ
«Сампдория» клубининг 36 ёшли ҳужумчиси Фабио Куальярелла 26та гол билан А Серия тўпурари бўлди. Қайд қилиш жоизки, у тўпларининг 9тасини пенальтидан киритган.
«Аталанта» ҳужумчиси Дуван Сапата 23та гол билан иккинчи, «Милан» ҳужумчиси Кшиштоф Пёнтек 22та гол билан учинчи ўринни эгаллади.
А Серия тўпурарлари
26 - Фабио Куальярелла (Сампдория, 9 пен)
23 - Дуван Сапата (Аталанта, 1)
22 - Кшиштоф Пёнтек (Женоа/Милан, 2)
21 - Криштиану Роналду (Ювентус, 5)
17 - Аркадиуш Милик (Наполи)
16 - Андреа Петанья (СПАЛ, 6), Франческо Капуто (Эмполи, 3), Леонардо Паволетти (Кальяри), Дрис Мертенс (Наполи, 1)
15 - Андреа Белотти (Торино, 5), Чиро Иммобиле (Лацио, 4)
12 - Йосип Иличич (Аталанта),
11 - Жервиньо (Парма), Грегуар Дефрель (Сампдория), Стефан Эль-Шаарави (Рома), Мауро Икарди (Интер, 5)
10 - Лоренцо Инсинье (Наполи, 1)
А СЕРИЯНИНГ РАМЗИЙ ЖАМОАСИ
ЕВРОКУБОКЛАРНИНГ ИШТИРОКЧИЛАРИ ВА ЧЕМПИОНАТ ОМАДСИЗЛАРИ
Чемпионат якунига кўра, юқори тўртликдан жой олган «Ювентус», «Наполи», «Аталанта» ва «Интер» клублари Чемпионлар Лигасида Италия шарафини ҳимоя қилишади.
«Милан» ва «Рома», шунингдек Италия Кубогини қўлга киритган «Лацио» Европа Лигасида иштирок этишади.
«Эмполи», «Фрозиноне» ва «Кьево» В Серияга равона бўлишди.
«Брешия» ва «Лечче» А Серия йўлланмасини қўлга киритишди. Яна бир йўлланма эгаси «Читтаделла» ва «Верона» клублари ўртасидаги плей-офф ўйинларидан кейин маълум бўлади.
