Қозоғистон пойтахти Нур-Султонда спорт курашлари бўйича жаҳон чемпионати давом этмоқда. Бугун баҳсларни бошлаган эркин курашчилар Ихтиёр Наврўзов, Бекзод Абдураҳмонов ва Ҳасанбой Раҳимов дастлабки рақибларини мағлуб этиб, кейинги босқичга йўлланма олишди.
-70 кг вазн тоифасида баҳсларни бошлаган Рио олимпиадаси совриндори Ихтиёр Наврўзов баҳсларни квалификация босқичидан бошлади. Дастлаб ҳиндистонлик Каран Каранни 7:0 ҳисобида мағлуб этган Ихтиёр чорак финал йўлланмаси учун баҳсда болгариялик Алипошшо Умарпашевни 7:6 ҳисобида енгди.
-70 кг:
1/16 финал: Ихтиёр Наврўзов – Каран Каран (Ҳиндистон) 7:0
1/8 финал: Ихтиёр Наврўзов – Али Умарпашаев (Болгария) 7:6
¼ финал: Ихтиёр Наврўзов – Давид Баев (Россия)
-74 кг вазн тоифасида мусобақада қатнашаётган икки карра Осиё ўйинлари ғолиби Бекзод Абдураҳмонов квалификация босқичида дастлаб пуэрто-рикалик Франклин Гомесни 4:0 ҳисобида енгди. 1/8 финалда эса у кубалик Жеандре Гарзонни 10:6 ҳисобида мағлуб этди ва чорак финалга йўл олди.
-74 кг:
Саралаш: Бекзод Абдураҳмонов – Франклин Гомес (Пуэрто-Рико) 4:0
1/16 финал: Бекзод Абдураҳмонов – Еандри Кабальеро (Куба) 10:6
1/8 финал: Бекзод Абдураҳмонов – Ҳожимурод Гаджиев (Озарбойжон)
-125 кг вазн тоифасида иштирок этаётган Ҳасанбой Раҳимов саралашда венесуэлалик Луис Фелипе Урбанехани (10:0), 1/8 финалда венгриялик Даниель Лигети (5:0) ҳисобида енгди.
-125 кг:
1/16 финал: Ҳасанбой Раҳимов – Луис Фелипе Урбанеха (Венесуэла) 10:0
1/8 финал: Ҳасанбой Раҳимов – Даниель Лигети (Венгрия) соф ғалаба
¼ финал: Ҳасанбой Раҳимов – Таха Акгул (Туркия) / Александр Романов (Молдова)
Эслатиб ўтамиз, Бекзод Абдураҳмонов ва Ҳасанбой Раҳимов иштирок этаётган вазн Олимпия ўйинлари дастурига киритилган. Вакилларимиз камида ярим финалга чиқа олишса, Токио Олимпиадаси йўлланмасини нақд қилиб қўйишади.
