Боливия президенти Эво Моралес президентлик сайловлари натижаларини сохталаштиришда айбланиб, оммавий намойишлар бошланиши фонида истеъфога чиқди. Боливия армияси қўмондони ва полиция раҳбари президентни лавозимини тарк этишга чақирганди. Вице-президент Альваро Гарсиа Линера ҳам истеъфога чиққан.
«Биз ютқазган партиялар тарафдорлари уюштираётган зўравонлик ва тажовузни бошдан кечираётганимиз оғриқлидир. Шу ва бошқа сабабларга кўра мен истеъфога чиқмоқдаман ва бу ҳақидаги тегишли мактубни Боливия парламентига жўнатмоқдаман», деб айтган Моралес матбуот анжуманда.
Моралес мамлакатда юз бераётган тартибсизликлар тезда тўхташига умид билдирган. У, шунингдек, мамлакатда зўравонлик авж олмаслиги туфайли истеъфога чиққанини маълум қилган.
У юзага келган вазиятни давлат тўнтаруви деб атаган.
«Ака-ука, опа-сингиллар. Шуни айтмоқчиманки, бизнинг кураш тўхтамайди, биз тенглик ва тинчлик учун курашни давом эттирамиз. Ҳозир президент сифатидаги вазифам вазиятни тинчлантириш йўлини топишдан иборат», деб қўшимча қилган у.
Моралес, шунингдек, мамлакатни тарк этмаслигини айтган. «Мен Боливияни тарк этмайман. Менинг қочишим учун асос йўқ», дея таъкидлаб ўтган Моралес.
Оммавий намойишлар 20 октябрь куни ўтказилган сайловлар натижалари норозилик уйғотиши ортидан бошланганди.
Сайловда Моралес 41,7 фоиз овоз олган, унинг асосий рақиби, собиқ президент Карлос Меса эса 36,51 фоиз овоз олганди.
Моралес биринчи турда ғалаба қозонгани ва тўртинчи муддатга президент бўлишга ҳақли эканини таъкидлаганди.
Бу 2016 йилги референдум натижаларига ҳам зид бўлиб, ўшанда халқ унинг тўртинчи марта президентликка сайланишига қаршилик билдирганди.
Якшанба куни халқаро кузатувчилар президентлик сайловида қоидабузарликлар бўлганини маълум қилди. Америка давлатлари ташкилоти вакиллари сохта имзолар ва натижаларнинг оммавий манипуляцияси ҳолатлари аниқланганини қайд этишган.
Шундан сўнг тоғ саноати вазири ва парламентнинг қуйи палатаси спикери каби нуфузли амалдорлар истеъфога чиқишди, улар Моралеснинг асосий иттифоқчилари саналишарди, Бош прокуратура эса республика Олий Сайлов трибунали ҳаракатлари юзасидан текширув бошланишини маълум қилди.
Президент сайловлар қайта ўтказилишини маълум қилиб, сайлов органи таркибини алмаштирди, аммо намойишчилар бунга рози бўлишмади, бир неча соат ўтиб, армия ва полиция раҳбарлари талабидан кейин президент давлат телеканали орқали мурожаат билан чиқиб, ўз истеъфосини эълон қилди.
Моралес мамлакатни 14 йилдан ошиқ вақт давомида бошқарди, у республика тарихидани ҳиндулардан чиққан илк президент бўлганди.
Куба Моралесни қўллаб-қувватлаб, унинг кетишини давлат тўнтаруви деб атаган. Мексика ҳукумати ҳам Моралесга Боливия пойтахти Ла-Пасдаги элчихонасида бошпана беришга тайёрлигини маълум қилган.
Боливия конституциясига кўра, президент ўз лавозимидан кетгач унинг мажбуриятлари дастлаб вице-президентга, сўнгра сенат спикерига, ундан кейин депутатлар палатаси спикерига ўтади. Бироқ уларнинг барчаси мамлакатни бошқаришдан бош тортишган.
Боливия сенатининг иккинчи вице-спикери, мухолифат вакили Жанин Аньес олий ҳокимият мамлакат раҳбарияти истеъфосидан кейин унга ўтишини эълон қилган.
Pagina 7 нашрининг ёзишича, Моралеснинг самолёти Аргентина бўйлаб парвоз режасини сўраган. Таъкидланишича, Моралеснинг укаси Эль-Альто аэропортидан учиб кетган.
