Boeing корпорацияси жанговар дронлар Loyal Wingman’нинг учта прототипидан биринчисини тақдим этди. Ушбу қурилма Австралия ҳарбий-ҳаво кучлари буюртмасига кўра яратилмоқда.
Турли давлатлар қуролланишида турган ва одам томонидан масофадан бошқарилувчи жанговар дронлардан фарқли ўлароқ, Loyal Wingman сунъий онг билан жиҳозланади. Бунда ҳам инсон аралашуви керак бўлса-да, у анча камаяди.
Meet the first aircraft behind the Boeing #AirpowerTeaming System program. This aircraft is one of three #LoyalWingman prototypes being flight tested with the @AusAirForce, laying the foundation for future airpower teaming aircraft to be developed for other global forces. pic.twitter.com/OunnLGrgu9
— Boeing Defense (@BoeingDefense) May 4, 2020
Ушбу дронларни яратиш дастури раҳбари Шейн Арноттнинг таъкидлашича, бундай дронларнинг оммавий ишлаб чиқарилиши “2020-йиллар ўрталарида, балки ундан эртароқ” бошланиши мумкин. Дроннинг синовлари жорий йил охирида бошланиши керак.
Янги қурилманинг узунлиги 11,6 метрни, учиш узоқлиги 3,7 минг км.ни ташкил қилади. У Boeing’нинг Австралиядаги жамоаси томонидан ишлаб чиқилмоқда. Австралия ҳарбий-ҳаво кучлари лойиҳага 25,7 млн доллар сармоя киритган.
Сунъий онг билан жиҳозланувчи дронлар жангда мустақил ёки гуруҳнинг бир қисми сифатида ҳаракат қилиши мумкин. Бунда у бошқа самолётларга нисбатан хавфсиз масофани сақлай олади.
Австралия ҳарбий-ҳаво кучлари вице-маршали Кэтрин Робертснинг айтишича, Loyal Wingman жанг шароитида қурол ташиши ва самолётларни ҳимоялашда хизмат қилиши мумкин. Бундай дронлардан 16 тагачаси учувчилар бошқарадиган самолётлар билан биргаликда у ёки бу вазифани бажаришда жанговар гуруҳ шакллантириши мумкин. Таъкидланишича, лойиҳага АҚШ ва Британияда қизиқиш билдирилмоқда.