Жаҳоннинг нуфузли футбол нашрларидан бири «France Football» барча даврларнинг энг яхши футболчиларидан иборат рамзий жамоани тузди.
Ушбу таркибни аниқлашда дунё бўйича турли ОАВларда фаолият юритаётган 177 нафар спорт журналисти иштирок этган. Ушбу ОАВ вакиллари «Олтин тўп» ғолибини аниқлашда мунтазам қатнашиб келган журналистлардир.
«Орзулар жамоаси»дан собиқ иттифоқ миллий жамоаси дарвозабони, 1960 йилги Европа чемпиони, футбол тарихида «Олтин тўп»га лойиқ кўрилган ягона дарвозабон Лев Яшин ҳам ўрин олган. Футбол тарихидаги энг яхши жамоага қуйидаги футболчилар киритилди:
Лев Яшин (СССР) — Паоло Мальдини (Италия), Франц Беккенбауэр (ГФР), Кафу (Бразилия) — Лоттар Маттеус (ГФР), Хави (Испания), Диего Марадона (Аргентина), Пеле (Бразилия) — Криштиану Роналду (Португалия), Роналдо (Бразилия), Лионель Месси (Аргентина).
Маълумот учун, France Football томонидан жаҳоннинг энг яхши футболчисига топшириладиган «Олтин тўп» соврини 1956 йилдан буён илк марта 2020 йилда пандемия сабабли топширилмайдиган бўлди.
