Тумандаги 4та мактабга ҳужжатларда кўрсатилган иситиш қозонлари ўрнига арзон нархдаги бошқа қозонлар ўрнатилгани аниқланди.
Андижон вилояти Марҳамат тумани халқ таълими бўлими мудири А.А. ва бир неча шахслар тил бириктирган ҳолда 216,8 млн сўм бюджет маблағини талон-торож қилганликда гумонланмоқда.
Иқтисодий жиноятларга қарши кураш департаментидан маълум қилишларича, 2019 йилда «J.S.» МЧЖ томонидан тумандаги 4 та мактабнинг иситиш тизимларини мукаммал таъмирлаш бўйича смета ҳужжатлари ишлаб чиқилган. Аммо ҳужжатларда кўрсатилган жами 421,7 млн сўмлик хорижда ишлаб чиқарилган «Kozlusan» русумли иситиш қозонлари ўрнига 205 млн сўмлик бошқа русумдаги иситиш қозонлари ўрнатилган.
Ж.С. ва бошқалар расмий ҳужжатларга сохта маълумотларни киритиш йўли билан 216,4 млн сўм бюджет маблағларини ўзлаштириш йўли билан талон-торож қилганликда гумонланмоқда.
Ҳолат юзасидан Жиноят кодексининг 167-моддаси (Талон-торож қилиш) ва 209-моддаси (Мансаб сохтакорлиги) билан жиноят иши қўзғатилди.
