Халқаро археологлар Қизилқумда авваллари фанга маълум бўлмаган динозавр турини аниқлашгани ҳақида хабар берилганди. Учқудуқ туманидаги Жарақудуқ ҳудудидан қазиб олинган динозавр суяклари канадалик олимлар ва Япониянинг Нагоя университети палеонтологлари томонидан тўлиқ ўрганилиб, баҳо берилди, дея ёзмоқда Daily Mail.
Маълум қилинишича, оғирлиги бир тонна ва узунлиги 8 метрга етувчи бу динозавр турига Ulughbegsaurus деб ном берилган. Бу динозавр Ўзбекистон ҳудудида 90 миллион йил аввал, Мезозой даврида яшаб ўтганлиги таъкидланмоқда.
Олдинроқ Геология музейи директори Аҳмаджон Аҳмедшаев 1999-2008 йилларда бир гуруҳ россиялик ва америкалик олимлар Жарақудуқ ҳудудида археологик қазиш ишларини олиб боргани ва жуда кўп миқдордаги топилмаларни олиб чиқиб кетгани ҳақида айтиб ўтганди.
