Меркель сиёсат билан бошқа шуғулланмаслигини тасдиқлади

“Нима билан шуғулланишимга келсак... Сиёсат билан бошқа шуғулланмайман. Аввал айтганимдек, дастлаб бироз дам оламан, кейин кўрамиз, миямга нима келаркин”, деб айтган канцлер ва навбати билан “мутолаа қилиши ва ухлашини” қўшимча қилган.

“Фикримча, кейин миямга бошқа режалар ҳам келади. Кўплаб йиллар давомида ўз эътиборимни менга берилган кун тартибига қаратганман ва ҳар доим шай ҳолатда бўлишимга тўғри келган”, деб таъкидлаб ўтган Меркель. Унинг таъкидлашича, “ҳукуматнинг асосий вазифаларидан бири юз берадиган воқеаларга дарҳол жавоб беришдан иборат”. “Ҳозир эса нима қилгим келишига қарайман. Бу икки ойлардан кейин маълум бўлади”, деб қўшимча қилган сиёсатчи. У ушбу интервьюси канцлер лавозимидаги охирги интервьюларидан бири эканини тан олган.

“Мен лавозимдаги охирги кунларда ўзига хос хайрлашув турнесини амалга оширмоқдаман ва бир томондан, бахтлиман. Кейин, албатта, бироз хафа бўламан, чунки ишим менга доим завқ келтирган ва ҳамон келтирмоқда”, деб айтган Меркель. У шу билан бирга “лавозимдаги охирги кунгача диққат-эътиборни сусайтирмаслик кераклигини” қўшимча қилган. “Темир фрау”, шунингдек, унинг сиёсатидан норозилар борлигини тан олган.

Канцлер хоним музокаралар вақтида, жумладан дўстона давлатлар раҳбарлари билан ўтган учрашувларда ҳамиша Германия манфаатларидан келиб чиқиб йўл тутганини таъкидлаб ўтган. “Бизни умумий қадриятлар, демократияга умумий қарашлар бирлаштиради. Бироқ кимдадир дунёга бошқача қараш бўлса, биз барибир унга қулоқ тутишимиз лозим. Чунки бир-биримизни эшитмасак, унда ечимлар топа олмаймиз”, деб қўшимча қилган Меркель.

У сиёсий фаолиятнинг асосий қоидаларига тўхталиб, “сиёсат билан шуғулланиш санъати қолган жиҳатлар қатори келажакка ҳаддан ташқари кўп режалар тузмаслик ва бажара олмайдиган мажбуриятларни ўз зиммангга олмасликдан иборатлиги” ҳақидаги фикрни билдирган. “Бундан менинг кайфиятим, сен ваъда берган одамларнинг кайфияти бузилади”, деб айтган сиёсатчи. У “қаердан ғайрат олиши” ҳақидаги саволга “табиатдан, боғдаги ишлардан ва баъзида ҳамма нарсани унутишдан” куч олишини айтган.

24 октябрда Германия президенти Франк-Вальтер Штайнмайер Меркелга ва унинг ҳукумати аъзоларига ўз лавозимларидан бўшатилганлари ҳақидаги ёрлиқларни топширган. Бироқ улар янги ҳукумат шакллантирилмагунгача ўз вазифаларини бажаришни давом эттирадилар. Германиянинг янги канцлери декабрда сайланиши кутилмоқда.