Қонунчилик палатасида “Жиноят кодексига коррупцияга оид жиноятлар учун жавобгарлик муқаррарлигини таъминлашга қаратилган ўзгартиш ва қўшимчалар киритиш тўғрисида”ги қонун лойиҳаси биринчи ўқишда қабул қилинди.
Депутат Зуҳра Шодиеванинг маълум қилишича, статистика бўйича мансабдор шахсларнинг жиноятлари оқибатида давлат ва жамият манфаатларига 2018 йилда 556 млрд, 2019 йилда 1,858 трлн, 2020 йилда 500,1 млрд, 2021 йилнинг 9 ойида 658 млрд сўм моддий зарар етказилган.
Қонун лойиҳаси билан мансабдор шахсларга нисбатан чоралар кучайтирилмоқда. “Ҳокимият ёки мансаб ваколатини суиистеъмол қилиш”, “Ҳокимият ёки мансаб ваколати доирасидан четга чиқиш”, “Ҳокимият ҳаракатсизлиги”, “Мансаб сохтакорлиги” ва “Ҳокимиятни суиистеъмол қилиш, ҳокимият ваколатидан ташқарига чиқиш ёки ҳокимият ҳаракатсизлиги” жиноятлар агар “ғаразгўйлик” ниятида содир этилса, коррупциявий жиноят ҳисобланиши белгиланиб, мазкур ҳаракатлар учун оғирроқ жазолар белгиланяпти.
Ўзлаштириш ёки растрата йўли билан фирибгарлик қилиш, солиқ ва бошқа мажбурий тўловларни тўлашдан бош тортиш учун ҳукм қилинган, бироқ етказилган зарарни тўлиқ қопламаган шахсларга ва порахўрлик билан боғлиқ жиноятни содир этган шахсларга нисбатан жазодан муддатидан илгари шартли равишда озод қилиш ёки жазони енгилроғи билан алмаштириш татбиқ қилинмаслиги назарда тутилган.
