Conflict Intelligence Team (CIТ) суриштирув гуруҳи россиялик десантчилар Украина чегараси яқинига ташланаётгани ҳақида хабар қилди.
24 январь куни TikTok ижтимоий тармоғида темир йўл бўйлаб ташилаётган ҳарбий техникалар видеоси пайдо бўлган. Мазкур ролик Беларусь ва Украина чегарасида жойлашган Брянск области ҳудудида тасвирга олингани айтилган.
Видеода техникалар ортилган ва брезент билан ёпиб қўйилган темир йўл таркибини кўриш мумкин. Тадқиқотчи Роберт Лининг хабар қилишича, таркиб 31та «БМД-4М» жанговар десант машиналари ва саккизда «БТР-МДМ» зирҳли транспортёрини олиб келган.
«Бундан ташқари, поезд таркибидан бешта йўловчи вагони ҳам ўрин олган бўлиб, у 250 дан ортиқ кишини ташиш имконини беради. Шунингдек, биз платформаларда ҳаво-десант кучлари учун мўлжалланган саккизта қисқартирилган икки ўқли «КамАЗ-43501» юк машиналарини санадик», дея хабар беради CIТ.
Россия темир йўллари маълумотлар базаси маълумотига кўра, поезд Иваново областидаги «Текстилний» станциясидан ҳаракатланган, 98-ҳаво-десант дивизиясининг 217-гвардия парашют-десант полки айнан шу ерда жойлашган. «Бу десантчиларнинг Укарина чегараси яқинига жойлаштирилаётганини исботловчи илк видео», дея қўшимча қилинади хабарда.
Кейинроқ Беларусь мудофаа вазирлиги Брестга «Иттифоқчилик жасорати» қўшма ўқув машғулотларида иштирок этиш учун «россиялик десантчилар эшелони» келганини маълум қилди.
- Январь ойида Беларусда Иттифоқ давлатининг жавоб қайтариш кучларини текшириш бўйича машғулотлар бошланди. Россиялик ҳарбийлар мамлакатда 9 февралгача қолиши кўзда тутилган, 10-20 февраль кунлари Россия-Беларусь ҳарбийларининг «Иттифоқчилик жасорати — 2022» қўшма машғулотлари бўлиб ўтади. Машғулотларда Беларусь Қуролли кучлари тўлиқ таркибда ҳаракатланади, Россия эса Шарқий ҳарбий округ, Ҳаво-космик кучлари ва Ҳаво-десант кучларини жалб этган.
- 2021 йил кузидан Россия Украина чегаралари яқинида ҳарбийларини тўплай бошлади, бу эса Ғарб давлатларида Украинага ҳужум тайёрланаётгани бўйича хавотирлар пайдо қилди. Россия ҳукумати ҳарбийларнинг ҳаракатини машғулотлар билан изоҳлаган ва ҳеч кимга ҳужум қилмоқчи эмаслигини билдирган.
