Иккиламчи бозордан уй сотиб олиш учун ажратиладиган ипотека кредитларини қайта молиялаштириш вақтинча тўхтатилди

“Ўзбекистон ипотекани қайта молиялаштириш компанияси” AЖ хабарига кўра, Ўзбекистонда ипотека бозорини такомиллаштириш мақсадида Молия вазирлиги ва Осиё тараққиёт банки ҳамкорлигида Ўзбекистонда ипотека бозорини ривожлантириш дастури ва уни 2019 — 2021 йилларда амалга ошириш концепцияси ишлаб чиқилган. 

Концепцияга мувофиқ, дастурнинг асосий вазифаларидан бири Ўзбекистон президентининг 2019 йил 13 майдаги ПҚ-5715-сонли қарори иловаси билан белгиланган йўл харитасига асосан “Ўзбекистон ипотекани қайта молиялаштириш компанияси”ни таъсис этиш ва фаолиятини йўлга қўйиш ҳисобланади.

Дастурга мувофиқ, компания фаолиятини бошлаш учун дастлабки босқичда Осиё тараққиёт банкининг 150 миллион AҚШ доллари миқдоридаги қарз маблағлари тижорат банкларининг мақбул ипотека кредитлари портфелини қайта молиялаштириш учун ажратилиши кўзда тутилган бўлиб, ушбу ресурсларни босқичма-босқич 2023 йилнинг биринчи чораги якунига қадар ўзлаштириш режалаштирилган.

“Бироқ, аҳолининг ипотека кредити ҳисобига иккиламчи бозордан уй-жой сотиб олишга бўлган катта қизиқиши ҳамда тижорат банклари томонидан аҳолининг ушбу талабини қондириш мақсадида фаол кредитлар ажратиши натижасида, дастурда назарда тутилган маблағлар муддатидан аввал, яъни 2022 йилнинг биринчи чораги давомида ўзлаштириб бўлиниши кутилмоқда. 

Бу ҳақда тижорат банклари 2021 йилнинг декабр ойида, дастур бўйича қолдиқ мавжуд ресурслар доирасида етарлича мақбул ипотека кредити портфеллари шакллантириши лозимлиги юзасидан Компания тарафидан ёзма равишда хабардор қилинган эди.

Бугунги кунда компания Молия вазирлиги ва бошқа институтлар билан биргаликда, шу жумладан, халқаро ташкилотлар билан ҳам, ипотека кредитларини қайта молиялаштириш мақсадида ресурсларни жалб қилиш бўйича фаол равишда тегишли ишларни олиб бормоқда. 

Юқоридагиларни инобатга олиб, шунингдек, молиялаштириш манбалари аниқлангунга қадар, компания иккиламчи бозордан уй-жой сотиб олиш учун ажратиладиган мақбул ипотека кредитларини қайта молиялаштиришни вақтинчалик тўхтатиб турибди”, дейилади расмий маълумотда.

Билдирилишича, банклар мақбул ипотека кредитларини қайта молиялаштириш ишлари тикланганлиги тўғрисида компания томонидан тегишли равишда келажакда хабардор қилинади.