Суратларда Су-25 қирувчи самолётлари, С-400 ва «Искандер» ракета мажмуаларини кўриш мумкин.
Reuters агентлиги Беларусь ва Украина чегарасида жойлаштирилган ҳарбий техникаларнинг сунъий йўлдошдан олинган суратларини эълон қилди. Суратлар Maxar Technologies компанияси томонидан тақдим этилган.
Қайд этилишича, суратлар 4 феврал куни Ельск (Украина билан чегарага 20 км), Речица (чегарагача 55 км) ва Лунинец (50 км) шаҳарларида олинган.
Maxar Technologies суратларда 15та Су-25 қирувчи самолёти ва Лунинец аэродромидаги С-400 зенит-ракета мажмуаларини аниқлаган. Ельскдан олинган суратларда «Искандер» ракета мажмуалари ва реактив ўт очиш тизимлари акс этган.
Reuters агентлигининг таъкидлашича, журналистлар фотосуратларнинг ҳақиқийлигини текшира олмаган.
Аввалроқ Россия ва Беларусь иттифоқ давлати кучларининг ҳарбий тайёргарлигини текшириш учун машғулотлар ўтказиши режалаштирилгани айтилганди.
Россия мудофаа вазири ўринбосари Александр Фоминнинг сўзларига кўра, биринчи босқичда 9 февралгача қўшинларни жойлаштириш амалга оширилади. Иккинчи босқичда 10 февралдан 20 февралгача ҳамкорликдаги машғулотлар ўтказилади.