АОКАда талабаларни турар жой билан таъминлаш, ижара ва тўлов-контракт масалалари мавзусида олий таълим вазири Абдуқодир Тошқулов иштирокида матбуот анжумани бўлиб ўтди.
Тадбирда вазирга йилдан-йилга янги квоталар, йўналишлар очилаётгани, бироқ янги иш ўринлари яратилмай туриб, бунақа йўналишларни очиб ташлайвериш қанчалик тўғри экани борасида савол берилди.
Абдуқодир Тошқуловга кўра, бу ўқув йилида йўналишлар умумлаштирилади, камайтирилади.
«60 та таълим йўналишини профессионал таълим даражасига туширдик. Масалан, университетларда «кутубхона йўналиши» деган таълим йўналиши бор, ҳолбуки бу йўналиш бўйича техникумлар ҳам мутахассис чиқара олади. Бакалавриатдаги 2 мингдан ортиқ таълим йўналишини бу ўқув йилида яна қисқартирамиз», - деди у.
Таъкидланишича, ҳар бир мутахассислик ва касб бўйича малака талабларини ишлаб чиқиш муҳим. Ҳозир Бандлик ва меҳнат муносабатлари вазирлиги билан шу йўналишда иш олиб борилаётгани, бунга 1 йил вақт керак экани айтилади.
