ГСДП раҳбари Шрёдернинг партиядаги аъзолигини сақлаб қолишга чақирди

Германия Социал-демократик партияси (ГСДП) ҳамраиси Ларс Клингбайл Германия собиқ канцлери Герҳард Шрёдернинг партиядаги аъзолигини сақлаб қолиш тарафдоридир. Бу ҳақда Клингбайл 11 сентябр, якшанба куни ARD телеканалига берган интервьюсида маълум қилди. 

Сиёсатчи таъкидлаганидек, август ойида ГСДПнинг махсус комиссияси Шрёдер партия низомини бузмагани ва Россия президенти Владимир Путинни қўллаб-қувватлаган нутқлари ва Россия давлат компанияларида ишлагани учун партиядан чиқариб юборилмаслиги керак деган хулосага келган.

Шундан сўнг комиссия вакиллари «тажовузкор урушга даъватлар ёки бир давлатнинг бошқа давлатга ҳужумини оқлаш ГСДПга аъзоликка мос келмайди», деб таъкидлади, бироқ Шрёдер бундай чақириқлар билан чиқмаган. Гарчи позицияни аниқроқ белгилаш «мақсадли ва ўринли» бўлса-да, собиқ канцлернинг баёнотлари унинг ГСДП сиёсатидан узоқлигини кўрсатмайди, деб ҳисоблади комиссия. 

«Суд жараёни унинг сиёсий жиҳатдан нотўғри баёнотлар берганини аниқ кўрсатди. Лекин уни четлаштириш учун асослар бор, деган маънода юридик жиҳатдан нотўғри баёнотлар йўқ», - дея хулоса қилди Клингбайл. 

«Герҳард Шрёдер бу давлатни шакллантирган ва кўплаб тўғри қарорлар қабул қилган канцлер эди. Лекин Россия масаласида у ноҳақ ва сиёсий изоляцияда бўлиб қолди. Бироқ комиссия хулосаси аниқ ва мен бу натижага қўшиламан», ГСДП ҳамраиси. 

Украина Қуролли кучларининг Харкив областидаги қарши ҳужуми муваффақияти фонида сиёсатчи Ғарб давлатларини Украинага кейинги қурол етказиб бериш масалаларида тезроқ ҳаракат қилишга чақирди. 

Унинг сўзларига кўра, Украина қўшинларининг муваффақиятли олдинга силжиши Ғарб томонидан Киевга етказилаётган катта ҳажмдаги ҳарбий ёрдам билан ҳам боғлиқ. «Бу давом этиши керак. Бу давом этади», деди Клингбайл ва Германиянинг янги таъминот қарорлари бошқа давлатлар билан биргаликда қабул қилиниши кераклигини таъкидлади. 

ГСДП ҳамраиси Киевга Ғарбда ишлаб чиқарилган жанговар танклар етказиб берилиши мумкинлигини алоҳида эслатиб ўтди. Улар, сиёсатчининг сўзларига кўра, ҳозирда ҳеч бир давлат томонидан Украинага берилмаяпти. Киевнинг талабларини, шунингдек, Украина Қуролли кучларининг муваффақиятларини инобатга олган ҳолда, энди «бу мамлакатни қўллаб-қувватлаш учун кейинги қадамлар қандай бўлиши мумкинлиги»ни ҳал қилиш керак, деди социал-демократ. 

Бундан ташқари, ГСДП ҳамраиси ҳукуматнинг газ бозоридаги вазиятга аралашувини тўловга лаёқатсизлик хавфидан қочиш учун асосли деб атади. Сиёсатчининг фикрича, электр ва газ нархи бугунгидек юқорилигича қолса, бундай хавф давом этади. 

«Мен газ бозорига аралашувимиз тарафдориман», деди Клингбайл. «Инқироз учун ҳисоб-китоб» ҳар қандай ҳолатда ҳам тўланади - бозорларга аралашув орқали ёки кейинроқ, банкротлик ёки ишсизлик харажатлари орқали, деб ўз позициясини тушунтирди социал-демократ.