Яшнобод тумани Махтумқули кўчасида икки кишининг ўлими билан якун топган йўл-транспорт ҳодисаси содир бўлди.
Тошкент шаҳар ИИББ ЙҲХБ хабарига кўра, 2022 йил 9 октябрь куни соат 20:30 ларда Тошкент шаҳар Яшнобод тумани Махтумқули кўчаси 79-уй қаршисида йўл-транспорт ҳодисаси рўй берган.
Ҳайдовчилар: 1981 йилда туғилган В.Ш. бошқарувидаги Nexia-3 русумли транспорт воситаси, 1992 йилда туғилган Р.М. бошқарувидаги BMW русумли транспорт воситаси, 1992 йилда туғилган Т.И. бошқарувидаги Nexia-3 русумли транспорт воситаси ва 1999 йилда туғилган Б.А. бошқарувидаги Lacetti русумли транспорт воситалари иштирокида йўл транспорт ҳодисаси содир бўлган.
Ҳодиса оқибатида Nexia-3 русумли автомашина ҳайдовчиси ва йўловчиси олган тан жароҳати туфайли воқеа жойида вафот этган.
Ҳолат юзасидан Тошкент шаҳар ИИББ Тергов бошқармаси томонидан Ўзбекистон Республикаси ЖК нинг 266-моддаси 3-қисми билан жиноят иши қўзғатилиб, тергов ҳаракатлари олиб борилмоқда.