Намойишчилар Дина Болуартенинг истеъфога чиқишини, янги сайловлар ўтказилишини ва Перунинг ҳибсдаги собиқ президенти Педро Кастильо озод этилишини талаб қилмоқда. Болуарте муддатидан олдин сайловларни 2024 йилда ўтказишни таклиф қилди.
Перуда янги президент Дина Болуартега қарши намойишларнинг иккинчи куни. 11 декабрь, якшанба куни намойишчилар мамлакат жанубидаги Андауайлас аэропорти ишини тўхтатиб қўйиб, ёнилғи омборига ўт қўйишди. Сўнгги расмий маълумотларга кўра, намойишлар чоғида икки киши, жумладан, бир нафар вояга етмаган шахс ҳалок бўлган, яна беш нафар намойишчи яраланган.
Намойишчилар мамлакатнинг бошқа ҳудудларида ҳам магистрал йўлларни тўсиб қўйган, дея хабар беради dpa. Намойишчилар ва полиция ўртасида тўқнашувлар бўлган. Бир кун аввал Андахуайлас шаҳридаги тартибсизликларда 16 нафар тинч аҳоли вакили ва тўрт нафар полициячи яраланган эди.
Норозиликларга жавобан Дина Болуарте мамлакатда муддатидан олдин президентлик сайловларини 2026 йил ўрнига 2024 йилнинг апрелида ўтказишни таклиф қилди. Тегишли қонун лойиҳаси парламентга тақдим этилади, деди янги президент 11 декабрь, якшанба куни телемурожаатида.
Перуда норозилик намойишлари президент Педро Кастильонинг лавозимидан четлатилиши ортидан бошланди. 7 декабрь куни парламент унга «маънавий қобилиятсизлиги» учун импичмент эълон қилди. Бир неча соат ўтгач, Кастильо полиция томонидан қўлга олинди, суд қарори билан у етти кунга тергов изоляторига жойлаштирилди. Кастильо конституциявий тузумга қарши ҳаракат қилиш ва давлат тўнтаришига уринишда айбланмоқда. Қўлга олинганидан кейин у Мексикадан сиёсий бошпана сўради.
Педро Кастильо ҳокимиятдан четлатилганидан сўнг, президент вазифаларини унинг ўринбосари Дина Болуарте бажара бошлади. Намойишчилар унинг истеъфосини, Кастильо озод этилишини ва муддатидан олдин сайловлар ўтказилишини талаб қилмоқда. Улар, шунингдек, умуммиллий иш ташлашга чақиришди.
