Жон ва Френсис – Британиянинг оддий фуқаролари. Улар турмуш қуришга аҳдлашиб, тўй учун барча тайёргарликни кўриб бўлишгач, ҳазил тариқасида қиролича Елизавета II га мактуб йўллаб, тўйга таклиф этишади.
2012 йилда бўлиб ўтган бу тўй кўпчилик британияликларнинг ёдида қолган. Жон ва Френсис Манчестер Сити залида никоҳ тўйларини ўтказишни режалаштириб қўйишади. Айнан ўша куни шу бинога қўшни залда қиролича Елизавета II ҳам қандайдир маросимда иштирок этиши керак эди. Бундан хабар топган жуфтлик ҳазил тариқасида қиролича саройига тўйга таклифнома юборишди. Улар ушбу мактубларининг қироличага етиб бормаслигига ишончлари комил бўлган ўша кунларда жавоб мактубини олишади. Елизавета таклифнома учун миннатдорчилик билдириб, уларни ҳайратда қолдиради. Аммо саргузаштлар шу ерда ниҳоясига етмайди.
Ниҳоят, узоқ кутилган тўй куни ҳам етиб келди. Кичик маросимлар залида келин ва куёвнинг ихчамгина бахт кечаси ўтказилаётган бир пайтда қўшни бинода қиролича Елизавета II ва Эдинбург ҳерцоги иштирокида 200 нафар маҳаллий кўнгиллилар билан кечки овқат бўлиб ўтаётган эди. Қиролича тўсатдан йиғилганлардан қўшни залда ўтказилаётган тўйда қатнашиш учун рухсат сўрайди ва кутилмаганда шаҳзода Филипп билан биргаликда жуфтликни табриклаш учун кириб келади.
Бу пайтда нафақат келин-куёв, балки уларни табриклаш учун йиғилган 40 га яқин меҳмонлар ҳам ҳайратдан қотиб қолишади.
Қироллик оиласининг ашаддий мухлиси бўлган 48 ёшли куёв Жон ушбу ташрифни “тўй тортининг креми” деб таърифлайди. Унинг таъкидлашича: “Қиролича келин бўлмиш Френсиснинг кўйлаги жуда ҳам бежирим эканлигини таъкидлаб, бизга улкан бахтлар тилади. Эдинбург ҳерцоги эса асал ойини қаерда ўтказмоқчи эканлигимизни ва бу бизлар учун совға бўлишини айтди. Биз бу ташрифни, ҳатто, орзу ҳам қилмаган эдик”.
Ушбу кун қироллик оиласи учун кечки овқатдан ташқари икки шаҳарда жойлашган тўртта шифохона ҳамда BBC штаб-квартирасига ташриф буюрилиши керак бўлган гавжум кун бўлган бўлса-да, улар ўз жадвалларидан жуфтликни табриклаш учун вақт ажратишган эди.
