ОКМК: янги лойиҳалар доирасида бизнес жараёнлар диагностикаси олиб бориляпти

“Олмалиқ КМК” АЖ Бошқарув раисининг иқтисодиёт, молия ва трансформация бўйича ўринбосари Феруза Ҳамидованинг маълум қилишича, комбинат ўтган йилги режани ортиғи билан бажарган:

“2022 йил якунлари бўйича Олмалиқ кон-металлургия комбинатининг молиявий-иқтисодий фаолияти бўйича барча прогноз кўрсаткичлар бажарилди. Хусусан, тайёр маҳсулотлар сотишдан тушган тушум 30,5 трлн сўмни ташкил этиб, бизнес-режа 108,2%га бажарилди. Комбинатда маҳсулот таннархини пасайтириш бўйича чора-тадбирлар амалга оширилиши ҳисобига харажатлар 418 млрд сўм ёки 3,8 фоизга иқтисод қилинишига эришилди.

Бу топшириқлар давлат раҳбарининг комбинатимизга ташрифи давомида топширилган вазифалар эди”,- деди раис ўринбосари.

Шунингдек ўтган йилда комбинат томонидан 947,5 млн долларлик маҳсулотлар экспорт қилиниб, прогноз 110,8%га бажарилиши таъминланди. ОКМКда ишлаб чиқарилган мис концентратларидан иборат биринчи контейнер блок поезди Болгариянинг Бургас шаҳрига юборилди.

“Pricewaterhousecoopers” МЧЖ билан биргаликда “Олмалиқ КМК” АЖда операцион самарадорликни ошириш, таҳлил қилиш, тегишли чора-тадбирларни ишлаб чиқиш, жорий қилишга кўмаклашиш ва ходимларнинг малакасини ошириш лойиҳаси доирасида бизнес жараёнлар диагностикаси ўтказилиши бошланиб ишлар жадал кетмокда.

Масъулларнинг сўзларига кўра, 2022 йил бошида электр таъминоти тизимида юз берган “блекаут” туфайли 25 январдан 28 январга қадар комбинат фаолиятининг тўлиқ тўхталиши, маҳсулот ишлаб чиқаришга салбий таъсир кўрсатди.

Тезкор равишда кўрилган чоралар эвазига, биринчи навбатда энг муҳим участкаларга электр токини етказиш, шунингдек, ички захираларининг ишга туширилиши ҳисобига сотиладиган маҳсулотлар ишлаб чиқариш таъминланди. Жумладан, мис катоди ишлаб чиқариш режаси (148,5 минг тонна) 100 %га, мис сими, эмалланган сим, мис купороси режаси 100 %га бажарилди. Қимматбаҳо ва нодир металлар бўйича режа кўрсаткичлари ортиғи билан бажарилишига эришилди. Хусусан, олтин ва кумуш ишлаб чиқариш вазифаси мос равишда 100,3 %га, аммоний перренати 132,4 %га, селен (34,5 тонна), теллур (2,8 тонна) 100,0%га, палладий кукуни режаси 183,9 %га бажарилган.

2022 йилда рух металли ишлаб чиқариш 90,0 минг тоннани ташкил қилиб, режавий вазифа 100,0%га бажарилди. 111 111 тонна сульфат кислотаси ишлаб чиқилиб, режа 107,8%га, 478 тонна кадмий металли тайёрланиб, режа 105,5%га бажарилишига эришилди.

Жаҳон бозорида 1 кг молибденнинг нархи 22 доллардан 70-100 долларгача кўтарилишини инобатга олиб 2023 йилда молибден ишлаб чиқариш қувватларини 800 тоннадан 1 200 тоннага кўпайтириш лойиҳаси амалга ошириляпти. Мазкур вазифанинг ижросини таъминлаш мақсадида Мис эритиш заводининг Камёб металлар ишлаб чиқариш цехи кенгайтирилмоқда. Айни кунларда ушбу цехдаги мавжуд 4 та печга қўшимча яна 2 та печь қурилмоқда.

Шунингдек, мис ва рух ишлаб чиқаришдан ҳосил бўладиган ташланма эритмалардан қўшимча ноёб металлар ажратиб олиш бўйича илмий изланишлар натижаларини жорий қилиш режалаштирилган.

2023 йилда Рух заводи жамоаси томонидан 92,0 минг тонна рух металли, 105,6 минг тонна сульфат кислотаси, 470 тонна кадмий металли ишлаб чиқариш режалаштирилган.

Шунингдек, анжуманда комбинат ижтимоий сиёсати ҳамда  “Олмалиқ КМК” АЖнинг 2 фоиз акциялари сотилиши ҳақида сўз борди. Мутахассислар таъкидлаганидек, “Олмалиқ КМК” АЖ акцияларини сотиб олиш бу фойдали мулк эгасига айланиш демакдир. Акциядор нафақат жозибадор дивидендлар олиши (энг камида 30 фоиз) балки ушбу ташкилотга эгалик қилиши, уни бошқаришда иштирок этиш имкониятини қўлга киритади.

Олмалиқ кон-металлургия комбинати ахборот хизмати