Туркия президенти Ражаб Тоййиб Эрдўған ва унинг рафиқаси мамлакатда ишлаб чиқарилган TOGG электрокарининг илк соҳиблари бўлишди.
Анқарадаги президент саройида бўлиб ўтган тантанали топшириш маросимида конвейердан янги чиққан TOGG T10X — C-синфидаги кроссовернинг икки хил рангдагиси — қизил ва тўқ кўк туслиси тақдим этилди. Қизил туслиси Туркиянинг биринчи хоними Амина Эрдўғанга аталган.
Туркия президенти «Анадўлу» деб аталувчи қизил тусдаги автомобилни бошқариб кўрди. Бироқ ўзи бундан буён тўқ кўк тусли машинани бошқаришини таъкидлади.
Togg'un ilk akıllı cihazını teslim alıyoruz, millî gururumuzu yollara uğurluyoruz. 🇹🇷https://t.co/JtPu3Nti9f
— Recep Tayyip Erdoğan (@RTErdogan) April 3, 2023
«Бугун биз халқимизнинг 60 йиллик орзуси рўёбга чиққанининг гувоҳи бўлдик. TOGG рекордларни урди ва у бизнинг ўз автомобилимиз», – деган Эрдўған.
Эрдўған ушбу автомобиллар қардош Озарбойжон ва Ўзбекистон президентларига ҳам етказилишини айтган.
«Алиевга аллақачон етказилди. Бугун уни топширишади. Унинг ранги Анадўлу (қизил) эди. Чунки Илҳом Алиев шунақасидан хоҳлади. Ўзбекистон президенти Шавкат Мирзиёевга ҳам юборилади», — деган Эрдўған.
2022 йилнинг октябрида Бурса вилоятидаги Гемлик шаҳрида турк электромобилларини ишлаб чиқарувчи завод электромобилларни серияли ишлаб чиқаришни бошлаган эди ва унда шахсан Эрдўғаннинг ўзи иштирок этган эди. Келгусида ушбу заводда электромобилларнинг 5 та версияси 6 хил рангда ишлаб чиқарилади.
Ҳозирча иккита модел ишлаб чиқарилиши бошланган: булар — TOGG T10X SUV C синфидаги йўлтанламас машина ва TOGG T10S седани. 13 йил давомида лойиҳага 3,7 миллиард доллар инвестиция ётқизилади. Шунингдек, электромобилнинг иккинчи версияси — седан жорий йилнинг октябр ойида тақдим этилиши айтилмоқда
TOGG компаниясининг бош директори Гуржон Қорақошнинг журналистларга маълум қилишича, йилига 100 мингта автомобил ишлаб чиқариш режалаштирмоқда. Ишлаб чиқариш қувватлари бу кўрсаткични йилига 175 минг автомобилгача оширишга мўлжалланган. 2030 йилга бориб бир йилда йиғиладиган автомобиллар сони ярим миллионтага етказилади.
Электромобиллар ҳақида қуйидагилар маълум: тўрт йўловчини бағрига олувчи, фақат орқа ғилдираклари юритувчи бир моторли кроссовернинг 272 от кучига қувватига эга оддий версияси 7,6 сония ичида 100 км/соат тезликка эришади. У тўла қувватда 300 км йўл босади. Тўлиқ юритишга эга бўлган икки моторли, 544 от кучига эга варианти 100 км/соат тезликка 4,8 сонияда эришади ва тўла қувват билан 523 километр масофани босиб ўтиши мумкин. Аккумуляторни 80 фоизга қувват билан тўлдириш ярим соатдан кўп вақтни олмайди. Ишлаб чиқарувчилар вақт ўтиши билан TOGG C-SUV учинчи даражадаги автопилот билан ҳам таъминланишини ваъда қилишмоқда.
Илк TOGG электромобиллари яқинда эркин савдога чиқарилди. Уларнинг нархи 43 мингдан 54 минг доллар оралиғида бўлиши айтилмоқда. Кейинги бир ярим йил ичида завод фақат ички бозор учун ишлайди, сўнгра Германия ва Францияга экспорт бошланади.
