Куз фаслига келиб Риштон туманининг Навбаҳор қишлоғидан то Учкўприк тумани Сариққўрғон қишлоғигача йўлларда булғор қалампири қоплаётган ёки уни қуритиб сотаётган деҳқонларга кўзингиз тушади. Ойбек Ёқубов Ёйилма қишлоғида 60 сотих ерга булғор қалампири эккан. Деҳқон айни дамда ҳосилини йиғиштирмоқда. Дала ишларига ишчи аёлларни жалб қилган.
Булғор қалампири етиштириб сотиш билан шуғулланувчи деҳқон Ойбек Ёқубовнинг қўли қўлига тегмайди
“Булғор қалампири ўзимизнинг деҳқончилик. Кўчатларини Риштоннинг Жалаер қишлоғидан доналаб сотиб олиб кўкламда экамиз.
Бу йил кўчат нархи бироз кўтарилди. 60 сотих ерга 60-65 минг туп кўчат экдик. Мана, ҳозир пишиқ пайти келди, энди эса сотяпмиз. Деҳқончилик машаққатли иш. Анча меҳнат қилдик етиштиргунча.
Бу йил 60 сотих ерга булғор қалампири экдим, бошқа деҳқончиликларимиз ҳам бор. Даромад қилиш қарашга, қандай ўғит беришга боғлиқ. Яхши ишланса, яхши ҳосил олинади, албатта. Кунлик ишчилар ишлатамиз, нонушта, тушлигини қилиб бериб, қўлига 100 минг сўмдан берамиз. Ишчиларимиз асосан хотин-қизлардан иборат.
Янги терилган булғор қалампири килограммини 3,5-4 минг сўмдан, қуритилганини эса 20-22 мингдан сотяпмиз. Қуруғининг нархи озроқ тушгани учун ҳозир кўпроқ янгисини сотяпмиз. Одатда шу йўл четида қуритамиз. Қалампирларни кесиб ёйиб қўямиз. 3-4 кун ёки узоғи 1 ҳафтада қурийди. Харидорлар билан келишиб сотаверамиз кейин. Қолгани рўзғорга кетади.
Қуритилган булғор қалампирини асосан Боғдоднинг Мирзаобод қишлоғидан келувчи харидорлар сотиб олади. Улар қайта ишлаб кукунини экспорт қилишади. 10 кг ҳўлидан 2-2,5 кг қуруқ булғор қалампири чиқади», – дейди деҳқон Ойбек Ёқубов.
Шафоатхон Арзамованинг турмуш ўртоғи вафот этган. У рўзғор тебратиш учун кунлик ишга чиқади
«Қишлоқ аёллари билан кунлик ишга чиқамиз. Ҳозир айни булғор қалампири мавсуми. Эгатлардан териб чиқиб, ёйиб саралаймиз. Яхши, чиройлилари янгилигича сотилади, кўриниши унча яхши бўлмаганлари эса ёйиб қуритилади. Деҳқонларга нечта ишчи кераклигига қараб келаверамиз. Тушлик, нонушта қилиб беришади. Эрталаб соат олти ярим ёки еттиларда келиб, кечки беш яримда ишдан чиқамиз. Деҳқон қўлимизга ҳар куни 100 минг сўмдан пул беради.
Биз ёйиб берганимиздан кейин қуригач, харидор келиб олиб кетади, ўзлари қайта ишлашади. Бизнинг ишимиз териб, чиройли қилиб саралаб, ёйиб бериш. Ёйилганлари тахминан 10 кунда қурийди, унгача пайкалдагилар яна пишиб қолади, биз яна терамиз. Бу йилги нархлар аввалги йилларга қараганда анча паст.
Деҳқонлар шу ҳолатга келтиргунча кўп меҳнат қилади, пул сарфлайди. Лекин нарх бу аҳвол. 3,5 мингдан кўтармаяпти харидорлар. Ўғит фалон пул, техника ҳам қиммат. Бизнинг қора қозонни қайнатишга ёрдам бераётган шу деҳқонлардир, барака топишсин.
Биз ҳам оила боқишимиз керак, болаларимни ёлғиз катта қилдим. Ёшим 57 да. Имкон бўлса, ҳар куни чиқаман, шароит шуни тақозо қилади. Соғлиқ учун ҳам ишлаш керак-да, кайфиятимиз ҳам кўтарилиб кетади кулги-аския қилиб», – дейди Шафоатхон Арзамова.
Сарвар Зиёев, Kun.uz
Монтаж устаси: Абдусалим Абдувоҳидов.
