Ҳолат кушхонадаги оқова сув ва ичимлик суви қувурининг тешилиб, ўзаро қўшилиб кетиши сабабли кузатилган.
Тошкент вилояти, Олмалиқ шаҳридаги «Рамазон» маҳалласидаги хонадонлардан бирида жўмракдан қонли сув оқаётгани тасвирланган видео ижтимоий тармоқларда тарқалди.
Видео муаллифи қувур ёрилиши оқибатида кушхона қонлари ичимлик суви тармоғига кирганини таъкидлаган.
«Бизнинг кранимиздан қон оқяпти. Бунга қарайдиган, жавоб берадиган борми? Неча маротаба мурожаат қилганмиз, сувимизга труба ёрилиши оқибатида кушхонанинг ҳамма қонлари оқиб келиб, қўшилиб кетади. Биз шуни ҳар доим ичиб, касал бўляпмиз. Маҳалла раиси, ким жавоб беради бунга?», деди видео муаллифи.
Олмалиқ шаҳри ҳокимлиги мазкур ҳолат масъуллар томонидан эътиборга олингани ва муаммо бартараф этилаётганини билдирди.
«Рамазон» маҳалласидаги бир неча хонадондаги ичимлик суви жўмракларидан қонли сув оқиши кузатилган. Шаҳар «Сув таъминоти» корхонаси масъулларининг ҳолат юзасидан дастлабки маълумотига кўра, бу кушхонадаги оқова сув ва ичимлик суви қувурининг тешилиб, ўзаро қўшилиб кетиши сабабли кузатилган. Ҳолат зудлик билан масъуллар томонидан назоратга олиниб, ҳозирда таъмирлаш-тиклаш ишлари олиб борилмоқда», дейилади ҳокимлик хабарида.
«Тошкент сув таъминоти» МЧЖ муаммо юзага келганини тасдиқлади.
«15 та хонадон вақтида имкониятидан келиб чиқиб, қувур тортган ва хонадонларига ичимлик сувини олиб борган. Ўтган вақт давомида қувур чириб, тешилган ва кушхонадан чиққан сувлар билан аралашиб, шундай ҳолат юзага келган. Айни пайтда муаммо бартараф этилмоқда. Ичимлик суви қувури янгиланмоқда», деди ташкилот ахборот хизмати раҳбари Акбар Тоҳиров.
Қўшимча қилинишича, воқеа жойига Санитария-эпидемиологик осойишталик ва жамоат саломатлиги хизмати вакиллари ҳам етиб бориб, вазиятни ўрганмоқда.
