2021 йилда «Толибон» ҳаракати Кобулни эгаллаганда Афғонистоннинг бир қанча ҳарбий самолёт ва вертолётлари Ўзбекистон ҳудудига ўтган эди.
2021 йил августида Афғонистондан Ўзбекистон ҳудудига учиб ўтган 22 та ҳарбий самолёт ва 24 та вертолёт тақдири ҳамон АҚШ ва Ўзбекистон расмийлари томонидан муҳокама қилинмоқда. Бу ҳақда Қўшма Штатларнинг Тошкентдаги элчиси Жонатан Ҳеник маълум қилди.
Қайд қилинишича, АҚШ ва унинг иттифоқчилари Афғонистондаги 20 йиллик ҳарбий кампания давомида афғон ҳукуматига кўплаб самолёт ва вертолётлар тақдим этган. 2021 йилда «Толибон» Кобулни эгаллаган кунларда бортида 585 нафар афғонистонлик ҳарбий хизматчи бўлган 22 та ҳарбий самолёт ва 24 та вертолёт (Embraer EMB 314 Super Tucano, UH-60 Black Hawk, MD-530, PC-12 ва Ми-17) Ўзбекистон ҳаво ҳудудини кесиб ўтган.
«Биз Ўзбекистон ҳукумати билан самолётларнинг якуний жойлашуви бўйича ишлашни давом эттирмоқдамиз. Бу ҳақда эълон берамиз», деди элчи. Унинг сўзларига кўра, ҳарбий авиатехникалар ҳамон Сурхондарё вилоятида қолмоқда.
«Толибон» ушбу ҳаво кемалари Афғонистоннинг мулки экани ва улар қайтарилиши лозимлиги ҳақида бир неча бор баёнот берган. Ўзбекистон расмийлари самолёт ва вертолётлар АҚШ мулки эканини ва уларни қайтариб бўлмаслигини билдириб келмоқда.
Пентагон расмий вакили Жон Кирби ҳам Ўзбекистон авиатехникаларни Афғонистонга қайтармаслигини айтган.
