Савдо санкцияларини четлаб ўтиш устидан назоратни кучайтириш учун орган ташкил этилиши қонунбузарларга «яширинадиган жой йўқлиги» тўғрисида аниқ сигналдир, дея маълум қилди Лондон.
Буюк Британия савдо санкциялари, жумладан, Россияга нисбатан жорий қилинган санкциялар устидан назоратни кучайтирмоқда. Шу мақсадда махсус агентлик - Савдо санкцияларини қўллаш бошқармаси (OTSI) ташкил этилди. У, 11 декабр, душанба куни Британия ҳукумати эълон қилганидек, Россияга нисбатан қўлланилган жазоларни четлаб ўтишга уринаётган фирмаларга қарши курашади ва компанияларга ушбу санкцияларга риоя қилишда ёрдам беради.
Бундан ташқари, янги идора Россияга нисбатан қўлланилган жазоларни четлаб ўтишга бўлган уринишларни текширади, жарималар тўғрисида қарор қабул қилади ва агар керак бўлса, жиноий жавобгарликка тортиш учун ишларни Солиқ ва божхона хизмати (HMRC)га юборади, дейилади маълумотда. OTSI Россияга учинчи давлатлар орқали тақиқланган маҳсулотларни етказиб берувчи компаниялар фаолиятини текшириш учун жавобгар бўлади. Эндиликда компаниялар санкциялардан қочгани учун қаттиқроқ жазога тортилади, дея огоҳлантирди Лондон.
Лондон: янги идора - «яширинадиган жой йўқлиги бўйича аниқ сигнал»
«Биз жанговар машинани тўхтатиш мажбуриятини ортга сурмаймиз. Бу санкциялардан бўйин товлаганларнинг ортидан бориш ва ноқонуний ҳаракатларни давом эттириш учун зарур бўлган технология ва даромаддан маҳрум қилиш демакдир», - деди Британия саноат ва иқтисодий хавфсизлик вазири Нусрат Ғани. Унинг айтишича, савдо санкциялари идорасини яратиш қарори «санкцияларни бузганларга яширинадиган жой йўқлиги ҳақида аниқ сигнал» беради.
Унинг таъкидлашича, Россияга қарши жорий этилган санкциялар ишламоқда ва Буюк Британиянинг Россия билан савдоси тарихий энг паст даражага тушиб кетган. Лондон баёнотида, шунингдек, Украинада кенг кўламли уруш бошланганидан кейинги бир йил ичида (2022 йилнинг мартидан 2023 йилнинг февралигача) Россиядан Буюк Британияга товарлар импорти аввалги шу даврга нисбатан 94 фоизга камайгани айтилади.
Вазир: халқаро санкцияларсиз Россия яна 4 йиллик уруш учун пулга эга бўларди
Ўз навбатида, Бирлашган Қироллик ташқи савдо вазири Энн-Мари Тревелян янги идора ташкил этилиши Британиянинг санкциялар тизимини янада мустаҳкамлашига ва унга «глобал қоидаларга эътибор бермаётганларга савдо санкциялари таъсирини максимал даражада ошириш» имконини беришига ишонч билдирди. «Бизнинг ҳисобимизча, халқаро санкцияларсиз Россия урушни молиялаштириш учун 400 миллиард доллардан кўпроқ маблағга эга бўларди, бу эса яна тўрт йил давомида уни молиялаштириш учун етарли эди», деди у.
OTSI янги бўлими мавжуд Молиявий санкцияларни қўллаш идорасига (OFSI) қўшимча сифатида тузилмоқда ва 2024 йил бошида ўз ишини бошлайди.
