Украинада жанг қилаётган россиялик маҳкумларнинг афв этилиши қонунларни бузаётгани айтилди

Украинага қарши урушда қатнашгани учун судланганларни Россия президенти Владимир Путиннинг махфий фармонлари билан афв этиш ҳам жабрланганларнинг, ҳам бошқа фуқароларнинг ҳуқуқларини бузади. Бу ҳақда Жиноят қурбонларини қўллаб-қувватлаш жамғармаси (ҚҚЖ)нинг  11 январ, пайшанба куни ҚҚЖ Telegram-каналида эълон қилинган хабарида айтилади.

Путин маҳкумларни афв этиш ва уларнинг судланганлигини олиб ташлаш тўғрисидаги фармонларни имзолаган, бу Россия қонунларига зиддир, дейилади хабарда. Судланганлик фақат жазони ўтаган маҳкумлар учун олиб ташланиши мумкин.

Қонунларнинг яна бир бузилиши шундан иборатки, маҳкумлар фронтда олти ой ўтказганидан сўнг  афв этиляпти ва урушда қатнашишдан озод қилиняпти. Шу билан бирга, сафарбар қилинган россияликлар ва шартнома бўйича аскарлар хизмат муддати белгиланмаган, дея таъкидлайди ҳисобот муаллифлари. Шу тариқа, бир неча ойдан бери сафарбар қилинганларнинг хотинлари Украинада бир йилдан ортиқ уруш олиб борган эрларини ватанига қайтаришни талаб қилмоқда, бироқ Россия расмийлари бу талабларга эътибор бермаяпти.

Афв этилганлар яна оғир жиноятлар содир этяпти

Россия қонунларига кўра, жабрланувчилар маҳкумнинг колонияга келганидан то қамоқдан озод этилишигача бўлган ҳаракатлари ҳақида тўлиқ маълумот олиш ҳуқуқига эга. Бундай маълумотларни олишга уринган жабрланувчиларга рад жавоби берилган, чунки маҳкумлар президентнинг махфий фармони билан афв этилган, дейилади хабарда.

Бундан ташқари, афв этиш тўғрисидаги масалани кўриб чиқишда жабрланувчиларнинг фикри ҳам инобатга олиниши шарт. Бироқ, бу содир бўлмаяпти, расмийларнинг ҳеч бири уларга бундай савол билан мурожаат қилмаган, дейди ҳисобот муаллифлари. Ҳужжатда таъкидланганидек, Украинадан қайтган афв этилган ўта хавфли жиноятчиларнинг бир қисми яна оғир зўравонлик жиноятларини содир этяпти, бу эса жамиятда кескинликни кучайтирмоқда.