Apple дунёдаги энг қиммат бренд деб топилди. Компания қиймати 516,6 млрд долларга баҳоланган. Иккинчи ва учинчи ўринда Мicrosoft ҳамда Google жойлашган.
Apple компанияси дунёнинг энг қиммат брендлари рейтингида ўтган йилги етакчи – Amazon'ни ортда қолдириб, биринчи ўринни эгаллади. Бу ҳақда Британиянинг Brand Finance консалтинг компаниясининг тадқиқотига таяниб, Интерфакс хабар берди.
Қайд этилишича, 2023 йилда Apple бренди баҳоси 74 фоизга қимматлашиб, 516,6 млрд долларни ташкил қилган. Microsoft деярли 78 фоизлик (340,4 миллиард долларгача) ўсишга эришиб, тўртинчи ўриндан иккинчи ўринга кўтарилган. Кучли учликни Google бренди эгаллаган. У 333,4 млрд долларга баҳоланган. Бренд ўтган йилда 18,5 фоизга қимматлаган.
Ўтган йили етакчи ўринни эгаллаб турган Amazon эса тўғридан тўғри тўртинчи ўринга тушиб кетган. Бренд қиймати 2023 йилда атиги 3,2 фоизга ўсиб, 308,9 миллиард долларни ташкил қилган.
Шунингдек, рейтингнинг етакчи ўнталигидан Samsung (99,4 млрд доллар), Walmart (96,8 млрд доллар), TikTok (84,2 млрд доллар), Facebook (75,7 млрд доллар), Deutsche Telekom (73,3 млрд доллар) ва ICBC (71,8 млрд доллар) жой олган.
Tesla брендининг нархи 12 фоизга (58,3 млрд долларгача) арзонлашди, бунинг натижасида у 2023 йилдаги тўққизинчи ўриндан дарҳол ўн саккизинчи ўринга тушиб кетди. Қийматнинг энг тез ўсиш суръатини Nvidia бренди кўрсатди, у ўтган йилги 117-ўриндан 30-ўринга кўтарилди (163 фоиз ўсиш, 44,5 миллиард долларгача), бу сунъий интеллектга асосланган ишланмаларга қизиқиш ортиши билан боғлиқ.
