Хорижий инвесторлар Юнусобод деҳқон бозорига 40 млн доллар сармоя киритиш ва уни ер остида икки қават, ер устида олти қаватли бозорга айлантиришни таклиф қилган.
Тошкент шаҳрининг Юнусобод туманидаги Юнусобод деҳқон бозори ва Аҳмад Дониш бозорини олти қаватли қилиш режалаштирилган. Бу ҳақда Ўзбекистон президенти Шавкат Мирзиёев пойтахт кенгаши йиғилишида маълум қилган.
Унинг сўзларига кўра, Тошкентнинг ўта чекланган майдони шароитида мавжуд инфратузилмани вертикал ўсиши ҳисобига саноат ва савдони ривожлантириш зарур.
«Масалан, 4,8 гектарлик Юнусобод деҳқон бозори бир қаватли бўлгани учун димиқиб кетган. «Алоқабанк» бошқаруви раиси Ирисбекова [бозорни] ер остига икки қават, ер устига олти қават қилиб қуришга хорижлик инвесторлар 40 миллион доллар сармоя киритиб ва 2500 иш ўрни яратиш таклифини берган», — деди президент.
Юнусободда туманида 16,5 гектар майдонда жойлашган кичик саноат зонасида 91 та бино ва иншоотлар жойлашган. Лекин уларнинг 77 минг кв метр биноларни 3−4 қават қилиб қайта қуриш ҳисобига қўшимча 200 минг кв метр ҳосил бўлиши мумкин, деди Шавкат Мирзиёев.
Президент сессияда Амир Темур шоҳкўчасидаги саккизта давлат идораси биноларини реконструкция қилиш ва савдо объектлари, офислар ва ер ости тўхташ жойларига эга меҳмонхоналар ташкил этиш учун тадбиркорлик субъектларига беришни ҳам таклиф қилди.
