iPhone 14pro сотилишини айтиб, фуқароларни чув тушириб келган йигитнинг қилмишларига чек қўйилди.
Наманган вилояти Янгиқўрғон туманида яшовчи А.Т. ИИОга мурожаат қилиб, банк картасидан 1 900 000 сўм миқдоридаги пул маблағлари номаълум шахс томонидан фирибгарлик йўли билан ўзлаштирилганини маълум қилган.
Тезкор-қидирув хизмати Киберхавфсизлик бўлинмалари ходимлари томонидан ўтказилган тезкор-қидирув тадбирлари натижасида, мазкур жиноятни Андижон вилояти Андижон шаҳрида яшовчи 27 ёшли М.О. содир этгани аниқланган.
Гумонланувчи сифатида тергов ҳаракатларига жалб этилган, М.О. “Телеграм” мессенжери орқали “iPhone 14pro сотилади” дея ёлғон эълон жойлаштирган ва бу эълонга ишонган жабрланувчи А.Т. билан телефон орқали гаплашиб, уни ишончига кириш орқали, олдиндан 1 900 000 сўм миқдоридаги пулларни ўзининг фойдаланувида бўлган банк картасига ўтказиб олган ва ёзишмаларни ўчириб юбориб, унинг қўнғироқларига жавоб бермай, қора рўйхатга киритиб қўйган.
Мазкур ҳолат юзасидан Жиноят кодексининг 168-моддаси 3-қисми билан М.О.га нисбатан жиноят иши қўзғатилди.
Қонунга мувофиқ, ЖКнинг 168-моддаси 3-қисмидаги жиноий хатти-ҳаракатлар учун 5 йилдан 8 йилгача озодликдан маҳрум қилиш жазоси назарда тутилган.
